iklan

COVALIMA, POLÍTIKA

Governu sensibiliza matadalan PMOPA ba autoridade Covalima

Governu sensibiliza matadalan PMOPA ba autoridade Covalima

Autoridade Covalima partisipa sensibilizasaun PMOP iha salaun Autoridade Munisipál Covalima (AMC). Imajen Tatoli/Celestina Teles.

COVALIMA, 08 jullu 2022 (TATOLI)–Governu liuhosi Ministériu Administrasaun Estatal (MAE) sensibiliza matadalan Programa Mão de Obra ba Postu Administrativu (PMOPA) ne’ebé implementa iha tinan fiskal 2022 ba autoridade sira iha Munisípiu Covalima.

Diretór interinu Planeamentu Dezenvolvimentu Integradu Munisipál (PDIM) iha Ministériu Administrasaun Estatál (MAE), António Sousa de Jesus hateten, Governu realiza sensibilizasasun matadalan Programa Mão de Obra ba Postu Administrativu (PMOPA) bazea ba diploma ministeriál númeru 17/2022 hakerek liga ba nia prosesu ba suku sira bele identifika programa no prióridade tuir rítmu, tanba membru ema na’in-20 hosi na’in-ida sai xefe ne’ebé mai hosi xefe aldea ka joventude ida-ne’ebé fó fiar.

“Ami halo sensibilizasaun atu nune’e sira bele familiár no hatene andamentu ida-ne’e tanba bainhira ita la halo sensibilizasaun la intende liga ho prosedimentu tanba PMOPA ida-ne’e la’ós programa foun, maibé iha fiskál 2021 implementa ona, no komunidade iha suku hosi munisípiu no família hatene ona andamentu ida-ne’e,” António Sousa de Jesus hateten ba jornalista sira, iha salaun AMC, Kampung Baru, sesta ne’e.

Programa ida-ne’e implementa ona iha tinan fiskál 2021 no halo sosializasaun ida-ne’e atu sira bele familiár liután no hatene andamentu sira, nune’e sira-bele intende prosedimentu no programa ida-ne’e.

Programa ne’e prióridade liu ba tipu Mão de Obra hodi kapasita komunidade, empodera no hakbiit rekuperasaun ekonómia hanesan hamoos valeta, drainajen no kria jardin.

Implementasaun programa Mão de Obra ne’e, Governu aloka orsamentu ba munisípiu Covalima hamutuk 7,200.00 sei desgrega ba konta bankária ne’ebé sei aloka ba postu administrativu sira.

Adimistradór munisípiu Covalima, Francisco de Andrade, hateten implementasaun programa Mão de Obra ne’e administradór postu administrativu sira mak identifika planu no programa hodi aprezenta mai iha administrasaun munisípiu Covalima.

“Oras ne’e daudaun administradór postu sira aprezenta ona planu no programa liuhosi seksaun planeamentu hodi hato’o mai iha administrasaun. Sira-nia adiantamentu tama ona iha gabinete  maibé orsamentu mak seidauk entaun  ha’u rai hela,” nia dehan.

Enkauntu, implementasaun programa Mão de Obra iha tinan fiskál 2021 foku liu ba hadi’a estrada, hamoos valeta, kuda ai-funan no harii jardin iha edifisiu postu administrativu ne’ebé orsamentu mai hosi Orsamentu Jerál Estadu tinan 2021 no aloka ba kada postu administrativu nia montante $50.000.00 no hosi orsamentu ne’e faze dahuluk fó orsamentu $25,000.00.

Jornalista : Celestina Teles

Editór       : Cancio Ximenes

iklan
iklan

Comments are closed.

iklan
error: Content is protected !!