BOBONARO, 11 jullu 2022 (TATOLI) – Diresaun Transporte Terrestre (DTT), Delegasaun Territoriál Munisípiu Bobonaro, rekolla reseita ba kofre estadu hamutuk $18.555.00 iha trimestre daruak tinan 2022 nian.
Diretór DTT Munisípiu Bobonaro, José Paulo Henriques Baptista, esplika, taxa hirak-ne’e rekolla hosi fonte inspesaun veíkulu hamutuk $8,305.00 hosi totál invoice 810.
Nune’e mós lisensa trajetu $ 1,125.00 hosi totál invoice 37, karta kondusaun $6,755.00 hosi totál invoice 391 no rejistu mensál $2,350.00 hosi totál invoice 220.
Notísia relevante:DTT Bobonaro rekolla rihun $19-resin hosi ezame karta kondusaun
“Reseita trimestre segundu nian ba tinan 2022, ami halibur totál $18,555.00 kompostu hosi fulan abríl nian totál $4,867,50, maiu nian $5,865,00, juñu nian $7,822,50 hosi totál invoice 1,458,” nia informa ba Jornalista Tatoli, iha Soso, Maliana, segunda ne’e.
Enkuantu taxa anuál ne’ebé Diresaun Transporte Terrestre Munisípiu Bobonaro iha tinan 2020 rekolla $87,294.00, no tinan 2021 rekolla hamutuk $70,351,50 hosi totál ema-ne’ebé trata dokumentu na’in-6,176, maibé reseita hirak-ne’e kada tinan menus dezde kedas 2016 tanba impaktu hosi impase polítiku no pandemia Covid-19 ne’ebé afeta komunidade sira-nia ekonomia.
Maibé durante ne’e diretór ne’e observa katak, komunidade, liuliu motorista sira hahú iha ona konsiénsia atu kontribui reseita hodi selu taxa ba estadu.
“Ha’u nafatin apela ba komunidade sira katak, ita nafatin sai sidadaun ne’ebé di’ak, banhira ita hola ona motorizada ka karreta tenke kompleta prosedimentu administrativa ne’ebé estabelese tuir lei ne’ebé mak fó kompetensía ba diresaun ne’e, atu nune’e ita-boot sira bele halo kualkér aktvidade ho livre,” nia fó hanoin.
Daudaun ne’e funsionáriu DTT Bobonaro nafatin halo atendimentu ba motorista sira, no ba hirak-ne’ebé hakarak trata karta kondusaun ba motorizada no karreta bele prenxe formuláriu tuir kritéria ne’ebé taka sai ona, atubele tuir teste eskrita, orál no prátika iha terrenu hafoin pasa mak sei entrega kartaun provizóriu.
Notísia relevante: DTT Bobonaro sei kontrola bís ne’ebé movimenta latuir regra
Jornalista : Sérgio da Cruz
Editór : Evaristo Soares Martins
