BOBONARO, 01 agostu 2022 (TATOLI)-Diretór Progarama Nasionál Dezenvolvimentu Suku (PNDS) Munisípiu Bobonaro, Paulino Viegas Tilman, garante konstrusaun Uma Kbiit Laek (UKL) regulár faze dahuluk tinan fiskál 2021 iha munisípiu ne’e sei konklui iha fulan-agostu tanba daudaun ne’e atinje ona 87,10%.
Tuir kalendáriu implementasaun UKL hamutuk unidade 150 data line iha fulan kotuk, maibé tanba situasaun klima la permite difikulta fornesedór sira mobiliza materiál lokál no fabrikadu to’o suku sira-ne’ebé la asesu estrada.
Paulino akresenta, daudaun ne’e konstrusaun iha suku hotu ona tama ona iha faze finalizasaun, maibé iha aleia Bour, suku Leolima, postu administrativu Balibo, mak ninia persentazen sei kiik liu, tanba iha fulan hirak liubá akontese udan-boot rezulta estrada kotu totál, nune’e foin lalais mak komunidade sira suku Hataz, postu administrativu Atabae organiza malu halo serbisu komunitária hodi hadi’ak fila-fali.
Alende ne’e iha postu administrativu Caialco nian mak suku Atudara, konstrusaun la’o atrazu oituaun tanba aldeia alvu ba implementasaun UKL jeografikamente iha liu foho lolon, nune’e tempu udan volume mota Marobo la fo biban ba kompañia fornesedór distribui materiál.
Notisia Relevante:PNDS sei konstrui UKL unidade 459 iha Bobonaro
“Ita iha 90 uma mak 100% inaguradu ona, ba sira-ne’ebé la hetan impaktu hosi natureza, hela de’it uma 60 mak seidauk remata, ita fó ona date line iha agostu ne’e tenke remata hotu ona, tanba fulan agostu ne’e ita-nia konsentrasaun ne’e bai ha implementasaun UKL segunda faze,” nia informa ba jornalista sira, iha Maliana, segunda ne’e.
Diretór ne’e subliña, hosi totál uma 60 ne’ebé seidauk finaliza barak liu hosi postu admistrativu Cailaco ho totál unidade 24, maibé suku Meligo finaliza no suku seluk ninia kuaze atinje ona 90%.
“Parte seluk ne’ebé kontribui atrazu mos animu hosi implementadór sira, ke balu pro-ativu tebes, balu mós atu book la book, aspetu seluk suku balu hanesan Saburai ahi laiha, sira iha de’it jeradór ida hosi PNDS mak sosa, ida-ne’e uza halo soldamentu ba besi sira-ne’e troka malu, uma ida hotu tiha mak ba fali uma ida, ikus mai ba fali seluk ne’e tarde ona,” nia katak.
Relasiona difikuldade hirak-ne’e iha tempu badak ekipa PNDS munisípiu no postu administrativu sira, sei halo monitorizasaun rútina serbisu 80% iha terrenu no 20% mak iha edifísiu hodi kompleta relatóriu sira.
Enkuantu iha tinan fiskál 2022 ne’e PNDS sei implementa Uma Kbiit Laek hamutuk unidade 459 iha munisípiu Bobonaro, suku 50 kada suku sei hetan uma sia to’o 12.
Jornalista: Sérgio da Cruz
Editór: Evaristo Soares Martins
