BOBONARO, 28 fevereiru 2022 (TATOLI) – Diretór Delegasaun Programa Nasionál Dezenvolvimentu Suku (PNDS) Munisípiu Bobonaro, Paulino Viagas Tilman, fó-sai katak iha tinan ne’e sei kostrui Uma ba Kbiit Laek (UKL) hamutuk unidade 459, iha suku 250, postu administrativu neen.
“Munisípiu Bobonaro iha 2022 ne’e ita sei implementa uma ho unidade 459, sira-ne’e iha ona prosesu rekollamentu dadus. Daudaun ne’e iha sistema baze dadus, ne’ebé sei hala’o lansamentu primeira pedra ne’e iha abríl,” nia informa ba Agência Tatoli, iha kna’ar-fatin, Holsa, Maliana, segunda ne’e.
Antes ne’e ekipa halo ona sosializasaun ba matadalan implementasaun projetu Uma Kbiit Laek iha iha suku 46 no sei falta de’it suku haat, maibé dadaun ne’e Ekipa Verifikadór Benefisiáriu (EVB) hala’o hela ona prosesu verifikasaun iha suku 46.
“Ninia implementasaun ne’e balu labele kobre aldeia hotu, ezemplu hanesan Ritabou ninia foin bele kobre aldeia haat tanba sira iha aldeia barak entaun ita kontrui unidade 12, iha suku neen seluk mós hetan uma 10 no restante sei hetan uma unidade sia,” nia katak.
Daudaun ne’e progresu kontrusaun UKL faze dahuluk iha munisípiu Bobonaro atinje ona 72%, klasifika ba númeru totál uma unidade 27 mak konklui ona no halo ona inagurasaun, maibé sei falta unidade 123 iha hela faze konstrusaun.
Hosi numeru hirak-ne’e progresu fíziku iha postu administrativu no suku balun to’o ona 80% no balu mós atinje ona 90%, kiikliu mak 60% tanba kondisaun klima la permite.
Jornalista : Sérgio da Cruz
Editór : Evaristo Soares Martins
