DILI, 09 agostu 2022 (TATOLI)— Diretór Jerál Serbisu Nasionál Ambulánsia Emerjénsia Médika, Horacio Sarmento, hateten desde marsu 2021 to’o agostu 2022, aviaun ambulánsia kontinua hikas operasaun normál, hodi tula pasiente hosi munisípiu mai Hospitál Nasionál Guido Valadares (HNGV).
Iha situasaun COVID-19 hahú dezembru 2020 to’o fevereiru 2021, mak aviaun ne’e la hala’o operasaun tanba pilotu iha hela Austrália.
“Maibé, daudaun Aviaun ambulánsia kontinua nafatin hala’o operasaun normál iha munisípiu sira hodi tula pasiente mai Hospital Nasionál Guido Valadares (HNGV) hodi hetan tratamentu intesivu hosi médiku sira,” Diretór Jerál ne’e hateten ba Agência TATOLI iha kna’ar fatin-Dili, tersa ne’e.
Kapasidade aviaun ne’e bele tula ema na’in-neen, no dalaruma tula pasiente na’in-rua akompaña ho família na’in-rua, inklui médiku ida ho enfermeiru ida.
Munisípiu ne’ebé asesu ba aviaun ne’e mak Lautém, Baucau, Viqueque, Manufahi, Covalima, Bobonaro, Ataúro, inklui RAEOA tanba munisípiu hirak-ne’e iha kampu aviasaun ne’ebé disponível.
Tuir akordu ne’ebé hatuur iha kontratu, ba-mai Dili-Ataúro, Governu selu kedan $320, karun-liu maka munisípiu Lautém ho RAEOA ho kustu ba-mai $1.000, tuir-kedan Viqueque no Munisípiu sira-seluk ba mai $600-resin.
Governu liu hosi Ministériu Sáude (MS), asina kontratu ho kompañia Mission Aviation Fellowship (MAF), hodi oferese aviaun ambulánsia ne’e hahú hosi 2019 to’o fulan outubru 2022.
Jornalista: Felicidade Ximenes
Editór : Florencio Miranda Ximenes
