DILI, 14 setembru 2022 (TATOLI)—Governu liuhosi reuniaun Konsellu Ministru (KM) ordinária, kuarta ne’e, aprova proposta hosi Ministru Obra Públika (MOP), Abel Pires da Silva.
“Konsellu Ministru delibera ona hodi autoriza prosedimentu aprovizionamentu nian, liuhosi konkursu públiku internasionál no realizasaun despeza ba obra públika sira kona-ba reabilitasaun estrada sira,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.
Notísia relevante: Autoridade munisipál koordena MOP prioritiza estrada Maliana-Bobonaro no Lolotoe
Projetu reabilitasaun estrada ne’e kompostu hosi estrada hosi munisípiu Manatuto bá postu administrative Laclo ho valór globál $ 8.315.330,44, enkuantu estrada hosi munisípiu Aileu (Be’cluru) bá Liquidoe ho valór globál $ 25.154.925,51.
Aleinde ne’e, estrada hosi Alas ba Wedeberek (munisípiu Manufahi) ho valór globál $23.232.296,32, estrada urbana Maliana pakote I ho valór globál $ 16.314.392,06, no estrada urbana Maliana pakote II, estrada prinsipál ho valór globál $23.587.019,36.
Aleinde ne’e, aprova mós prosedimentu ba reabilitasaun, seksaun hosi Laga bá Baguia pakote IV ne’ebé hanesan estrada munisipal sira no seksaun hosi Quelicai bá Ossu pakote III hanesan estrada munisipal sira.
Jornalista : Antónia Gusmão
Editora : Julia Chatarina
