Autoridade Vikeke dezloka ona komunidade afetada foho Builó bá fatin seguru
VIKEKE, 08 Juñu 2026 (TATOLI)—Prezidente Autoridade Munisípiu Vikeke, Francisco C. S de G. Soares, hamutuk ho Autoridade Postu Administrativu Ossú no akompaña husi Autoridade Protesaun Sivil (APC-sigla portugeza) dezloka ona komunidade afetada husi foho Builó bá hela provizoriamente iha fatin seguru iha Suku Builó.
Reprezentante komunidade afetada Aldeia Uaibobo, Suku Ossorua, Celestino Trindade, informa horisehik (07/05) Prezidente Autoridade Munisípiu Vikeke ho ekipa no Autordade Postu Ossú diretamentu ba haree foho ne’ebé monu no dezloka ona komunidade hamutuk na’in-90 bá Suku Builó.
Notísia relevante: Rai-nakdoko provoka danus ba uma rua no rai monu iha foho Builó
“Ami dezloka ona husi foho okos, tanba agora foho kontinua monu. Nune’e, horisehik lokraik ne’e ita-nia Prezidente Autoridade Munisípiu hamutuk ho ekipa APC no akompaña husi administradór Ossú haree situasaun ne’e deside muda ami husi ami-nia hela fatin bá hela provizoriamente iha família sira iha Suku Builó,” Celestino Trindade ba TATOLI iha Suku Builó, Segunda ne’e.
Nia esplika komunidade efetada sira-ne’e APC sei apoia nesesidade bázika ba sira atu konsome iha tempu difísil ida-ne’e.
Akontesimentun rai-nakdoko ne’e akontese iha Domingu (07/06) maizumenus tuku 7h30 Otl, iha-ne’ebé afeta ba foho Builó hamosu erosaun (rai monu) iha foho Builó. Husi akontesimentu referidu la estraga komunidade nia uma, maibé halo komunidade sira sai trauma.
Jornalista: Vitorino Lopes da Costa
Editór: Xisto Freitas da Piedade
