BOBONARO, 20 setembru 2022 (TATOLI)-Diretór Programa Nasionál Dezembolvimentu Suku (PNDS) delegasaun teritoriál munisípiu Bobonaro, Paulino Viegas Tilman, hateten suku rua iha postu Administrativu Balibo no Lolotoe mak sei atraza implementa konstrusaun Uma Kbiit Laek (UKL) tinan fiskál 2021.
Diretór ne’e hatutan, dadaun ne’e progresu konstrusaun iha suku 46 tama ona faze finalizasaun, falta de’it suku balu mak sei presiza kompleta materiál sira iha uma laran nian hanesan meza, kama, kadeira no seluk tàn.
Notísia relevante: PNDS garante UKL 2021 iha Bobonaro sei konklui iha agostu
“Ami implementa projetu 150 casas iha tinan 2021, agora atinje ona 93%, hela deit suku rua mak atraza liu, suku Deu-Det, Loloto’e no suku Leo-lima, no oras ne’e foin atinje 66%,” nia informa ba Jornalista sira iha Maliana, tersa ne’e.
Nia haktuir, suku rua refere atraza iha implementasaun tanba kestaun estrada no tempu udan, difikulta fornesedór sira mobiliza materiál fabarikadu ba to’o lokalidade konstrusaun.
Paulino akresenta, tuir kalendáriu implementasaun date line ba konstrusaun Unidade 150 iha fulan-jullu tinan ne’e, maibé liu tiha ona fulan tolu mós balun seidauk konklui.
“Ami fasilita de’it atu ita bele halo hotu lalais, tuir rekizitu no regra ne’ebé mak iha, ita fó date line hanesan maibé labele realiza,nmaibe ita nafatin buka meiu atubele aselera lalais atinje,” Diretór ne’e dehan.
Tuir Livru 3-B (Munisípiu), Autoridade Bobonaro hetan alokasaun orsamentu hosi programa PNDS-UKL hamutuk tokon $2.7. Hosi total ne’e atu finánsia atividade fíziku hamutuk tokon $2.6 ba suku 50 no aldeia hodi kontrui uma 150 unidade. Hosi montante orsamentu ne’e koloka ba operasionál $150.000 no fee ba BNCTL rihun $5.400.
Portantu iha tinan ne’e, Ministériu Administrasaun Estatál liuhosi PNDS implementa tán UKL siklus daruak hamutuk 459 kobre suku 50, postu administrativu neen. Hosi númeru ne’e balu hetan uma sia no suku Ritabou mak hetan uma 12 tanba aldeia barak liu.
“Agora suku lubuk ida maka komesa ona hahú setting daudaun, balun mobiliza ona materiál atubele hahú no halo konstrusaun kee rai-ku’ak no hatún fatuk simentu atubele halo ona fondasi,” Tilman esklarese.
Uma kbiit laek hanesan programa Governu konstituisional VIII liuhosi Programa Nasionál Dezenvolvimentu Suku (PNDS) hodi korresponde ho Planu Estratéjiku Dezenvolvimentu Nasionál (PEDN) 2011-2030, ne’ebé rekoñese povu Timor-Leste nia aspirasaun atu harii nasaun ne’ebé forte, prósperu no fó-moris di’ak, hodi redús pobreza no garante ema hotu hetan oportunidade hetan rai no uma hodi bele tulun nia hala’o moris ho dignu no seguru.
Tamba ne’e Governu kria tán dekretu leí katak hodi homosu tán UKL + ho nia Kategoria rua nune’e iha munisípiu Bobonaro katégoria (A) implementa postu administrativu Balibo ho totál benefisiáriu 75, ne’ebé Ministru Administrasaun Estatál, Miguel Perreira de Carvalho, halo ona lansamentu fatuk dahuluk loron 29 fulan-agostu ne’e.
Enkuantu katégoria (B) implementa iha postu administrativu Maliana ho totál benefisiáriu 259 hodi troka komunidade sira-nia zinku.
Maibé diretór UKL+ A iha Bobonaro fó prioridade liu ba suku Cowa tanba populasaun barak mak sei hela iha uma tali.
Notísia Relevante:MAE hatuur fatuk dahuluk UKL+ A unidade 75 iha Balibo
Jornalista: Sérgio da Cruz
Editór: Evaristo Soares Martins
