iklan

EKONOMIA, BOBONARO, HEADLINE, MUNISÍPIU

MAE hatuur fatuk dahuluk UKL+ A unidade 75 iha Balibo

MAE hatuur fatuk dahuluk UKL+ A unidade 75 iha Balibo

BOBONARO, 29 2022 (TATOLI) – Ministru Administrasaun Estatál (MAE), Miguel Pereira de Carvalho, segunda ne’e hatuur fatuk dahuluk ba konstrusaun Uma Kbiit Laek (UKL) + tinan 2022 kategoria (A) tinan 2022, hamutuk unidade 75 Iha suku Cowa no Batugade, postu administrativu Balibo, munisípiu Bobonaro.

Serimónia ne’e simbolikamente realiza iha aréa Badu-ut mean, suku Cowa no suku Batugade, postu administrativu Balibo hamutuk benefisiáriu 35 no sei implementa hotu iha territóriu nasionál ho totál rihun-ida resin ne’ebé sei implementa hosi Programa Nasionál Dezenvolvimentu Suku (PNDS) ho totál orsamentu millaun $25.

Ministru Administrasaun Estatál, Miguel Perreira de Carvalho, esplika, programa Governu tau prioridade ba UKL + (A) iha postu administrativu Balibo tanba komunidade sira-ne’ebé iha liña fronteira suku Batugade no Cowa Barak liu hela iha uma konstrui de’it ho tali-tahan.

Notísia relevante: CCM Bobonaro hili Balibo-Maliana implementa UKL+

“Ita-nia populasaun sira-ne’ebé hela besik ho nasaun viziñu sira-ne’e reprezenta imajen ita-nia rain, entaun iha ita-nia populasaun sira hela iha uma inkondisaun. Ne’e signifika ita-nia Estadu la tau matan, entaun liuhosi programa UKL+ ne’e atu hadi’a kondisaun hirak-ne’e,” nia informa ba Jornalista sira hafoin halo lansamentu

Nia dehan, Governu implementa programa ne’e ho objetivu atu lori naroman ba povu, tanba ne’e UKL+ A implementa iha Balibo sai hanesan pilotu ida ba Governu nune’e ba oin sei kontinua implementa ba komunidade sira-ne’e hela iha suku fronteira sira iha Covalima no Rejiaun Administrativa Espesiál Oe-Cuse Ambeni (RAEOA).

Enkuantu kona-bá UKL+ B hamutuk rihun-hitu resin governu sei lansa distribuisaun materiál iha fulan-setembru tinan 2022 ba territóriu nasionál.

“Distribuisaun zinku ba ita-nia populasaun sira tuir sekuénsia sira hanesan, primeiru identifika uluk sé mak sai hanesan benefisiáriusiariu, kritéria ida mak sira-nia kalen ne’e aat  ferujen troka hotu kedas, maibé sira hotu la hanesan, sira simu depende ba tamañu ka largura hosi uma,” nia informa.

Prezidente Autoridade Munisípiu Bobonaro, reforsa, konsellu koordenasaun munisípiu deside implementa UKL + kategoria (A) iha fronteira bazea ba rekomendasaun hosi Primeiru Ministru, Taur Matan Ruak ho razaun komunidade sira iha área ne’e barak mak uma tali.

“Primeiru ita-nia imajen nasaun nian, tanba ida-ne’e ita agradese ba VIII Governu Konstituisionál lidera hosi Jenerál Taur-Matan Ruak, hanesan luta na’in-ida, tanba nia kumpre ona saida mak sira koalia iha ai-laran, ohin loron implementa ona iha ita-nia rai, tanba Governu nia prioridade mak hadi’ak povu nia moris liuhosi hadi’ak kondisaun di’ak,” nia dehan.

Xefe suku Batugade, postu administrativu Balibo, Januário Moises, agradese ba governu tanba hahú tau prioridade ba komunidade sira iha liña fonteira.

“Ami sente Governu kria ona kondisaun  ida-ne’e hodi hakbiit ona ami-nia komunidade sira iha liña fronteira sai benefisiáriu ba UKL+, ami husu nafatin atu kontinua implementa programa tanba komunidade barak mak uma seidauk di’ak, atu nune’e sira bele sente hela iha uma ne’ebé dignu,” nia sujere.

Partisisipa iha lansamentu ne’e komposta bodi Sekretária Ezekutiva Téknika Programa Nasionál Dezenvolvimentu Suku (PNDS) nasionál , Claudina Soares Pinto, Komandante Unidade Patrullamentu Fronteira (UPF), Superintendenti Polísia Euclides Belo, Administradór Postu Administrativu Balibo, Maliana, Cailaco, Bobonaro no komunidade sira.

Notísia relevante: Prosesu verifikasaun UKL+ iha Maliana hela de’it Ritabou

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!