BOBONARO, 25 jullu 2022 (TATOLI) – Administradór postu administrativu Maliana, munisípiu Bobonaro, Tomás Laco-Loe, informa prosesu verifikasaun benefisiáriu Uma Kbiit Laek (UKL)+ kategoria (B) iha Maliana besik konklui tanba hela de’it aldeia rua iha suku Ritabou.
Nia akresenta aldeia rua ne’ebé ekipa verifikadór sira seidauk halo verifikasaun ne’e mak hanesan aldeia Uat no aldeia Maganutu tanba grografikamente distánsia aldeia rua refere dook hosi Maliana Vila.
Notísia relevante: CCM Bobonaro hili Balibo-Maliana implementa UKL+
“Ita-nia prosesu verifikasaun kuaze suku sira iha vila ne’e hotu ona, hela de’it aldeia rua, agora ekipa sira sei kontinua halo verifikasaun ba komunidade sira, tanba ne’e mak to’o agora ami seidauk simu lista ema na’in hira mak hatama ona dokumentu,” nia informa ba Tatoli, iha Maliana, segunda ne’e.
Nia haktuir, prosesu verifíkasaun ne’e transparante tanba envolve hosi ekipa tékniku Programa Nasionál Dezenvolvimentu Suku (PNDS), Ekipa Jestaun Suku (EJS), funsionáriu administrasaun postu Maliana, xefe suku no xefe aldeia sira.
Nia akresenta, parte autoridade postu mós nafatin orienta ekipa verifikadór benefisiáriu sira atu nafatin kumpre regra no la’o-tuir matadalan ne’ebé estabelese ona iha programa ne’e nune’e bele identifika komunidade ne’ebé merese sai benefisiáriu ba programa ne’e.
“Ha’u-nia haree polítika governu nia ne’e di’ak, tanba ajuda tebes ita-nia komunidade sira hodi hadi’ak sira-nia uma ne’ebé ke kalen ferujen, ku’ak taka hotu fali atubele hela iha uma dignu,” nia hateten.
Totál benefisiáriu UKL+ iha munisípiu Bobonaro kategoria (A) monu iha postu administrativu Balibo ho totál benefisiáriu 75 no kategoria (B) monu iha postu administrativu Maliana ho totál benefisiáriu 259.
Entretantu, Ministériu Administrasaun Estatál (MAE) liuhosi PNDS sei konstrui UKL+ uma Unidade 6000 iha territóriu nasionál ho kategoria rua mak hanesan; kategoria (A) totál uma 1000 ho kustu másimu $13,000 inklui mão de obra, médiu distribuisaun uma 71/PA/M kada suku sei hetan uma lima ka neen.
Enkuantu kategoria (B) sei konstrui uma hamutuk unidade 5000 ho kustu $ 2,400 inklui mão de obra $100 ho médiu distribuisaun 357 uma/PA/M no kada suku hetan uma 27 ba to’o 28.
Notísia relevante:PNDS Covalima sensibiliza UKL+ ba membru konsellu suku Debos
Jornalista : Sérgio da Cruz
Editór : Evaristo Soares Martins
