DILI, 03 Dezembru 2025 (TATOLI)-Autoridade Nasionál Lisensiamentu Ambientál (ANLA) rejista empreza hamutuk 591 trata lisensiamentu ambientál ba implementasaun projetu tuir kategória tolu iha Timor-Leste, hahú husi fulan-Janeiru to’o Novembru 2025.
Prezidente Autoridade Nasionál Lisensiamentu Ambientál, Maximiano Oliveira, hateten empreza sira-ne’e trata lisensiamentu ambientál ba implementasaun projetu manufaktureira, indústria, ospitalidade no seluk tan hamutuk 591 ne’ebé kompostu husi kategória tolu mak kategória A hamutuk sia (9), kategória B hamutuk 43 no mós kategória C hamutuk 595.
“Projetu ne’ebé kategória A no B ne’e projetu ne’ebé mak boot hanesan otelária ne’ebé boot no halo besik foho no tasi. Atu prevene ambiente ne’ebé saudavel ami prefere ba sira atu kuda ai-horis no mós tenke instala ekipamentu water. (saringan air) hodi taes foer no husik bee mak tun ba tasi foer sira labele tun hotu ba tasi,” Prezidente ne’e informa ba jornalista sira iha Hotel JL World, ohin.
Aleinde ne’e, nia hatutan, empreza boot seluk ne’ebé halo manufaktureira hanesan halo fabrikasaun ró iha Manatutu, Likisa, enkuantu kona-ba turizmu nian mak hanesan ospitalidade iha City 8, Jl World, Marine Square, Timor Plaza no Portu Tibar.
“Tamba ne’e mak ANLA nia papel atu haree ba impaktu ambientál. Enkuantu kona-ba rai-henek, fatuk no kee foho ne’e kompeténsia husi Autoridade Nasionál Minerál mak sei haree. Kona-ba ai-horis husi parte floresta mak haree, entaun servisu ne’e la’ós ANLA mesak mak haree maibé servisu konjunta mós husi ministériu seluk,” nia dehan.
Kritéria trata lisensiamentu ambientál
Empreza nasionál no internasionál tenke iha deklarasaun suku, hodi hamenus problema iha sosiedade, tenke iha mós lisensa komersiál husi SERVE, I.P, katak empreza ne’e rejistu duni iha Timor ho ninia estatutu sira.
Prepara mós dokumentu identidade hanesan pasaporte ka eleitorál, no tenke iha ninia estatutu, atu bele detein katak komerisál ne’e hamutuk ka individu.
Iha parte ida tan mak empreza tenks iha dokumentu impaktu ambientál no deklarasaun impaktu ambientál, maibé karik kategória C hanesan ofisina, karpintária no restaurante prepara de’it project document.
Jornalista : Alexandra da Costa
Editór : Cancio Ximenes
