BAUCAU, 06 outubru 2022 (TATOLI) – Sekretaria Estadu Formasaun Profesionál no Empregu (SEFOPE), kinta ne’e realiza enkontru ho membru plataforma hodi haree progresu planu asaun ne’ebé estabelese iha munisípu Baucau.
Diretora Nasionál Empregu Interiór SEFOPE, Clementina de Araújo Almeida, esplika, objetivu enkontru ne’e atu revee rezultadu membru plataforma ne’ebé antes ne’e estabelese iha fulan-agostu hanesan kria grupu traballu hodi apoia juventude sira asesu ba empregu no formasaun.
“Liuhosi atividade ida-ne’e bele tulun SEFOPE munisípiu hodi habelar informasaun kona-bá empregu no formasaun to’o baze,” Diretora Nasionál Empregu Intéeriór hosi SEFOPE ne’e informa ba Tatoli iha Vila Nova, kinta ne’e.
Objetivu seluk mak halo identifikasaun no halo planu asaun ba produtu hodi sai oportunidade hanesan liuhosi formasaun bazea ba nesesidade iha munisípiu Baucau.
Antes ne’e, grupu plataforma establese ona iha munisípiu seluk hanesan Lautem no Viquque maibé hafoin liuhosi avaliasaun deside munisípiu Baucau sai alvu hodi implementa planu asaun ne’ebé ideia hotu maihosi grupu tanba bazea ba koñesementu kondisaun hotu iha baze.
Grupu hirak-ne’e kompostu hosi sentru formasaun, setór privadu, juventude, feto no inkluzividade ne’ebé antes ne’e hetan apoia hosi parseiru GIZ liuhosi kolaborasaun ho SEFOPE.
Clementina Almeida argumenta, ho estabelesimentu grupu plataforma refere ba futuru bele ajuda redús ona númeru dezempregu iha munisípiu, maske seidauk totalmente maibé bele tulun ona juven sira hodi envolve iha kampu serbisu.
“Grupu sira-ne’e mai hosi entidade hotu tanba sira mak sai alvu hodi redús dezempregu iha rai-laran,” Clementina Almeida hateten.
Jornalista : Natalino Belo
Editór : Evaristo Saores Martins
