DILI, 06 outubru 2022 (TATOLI) – Xefe Suku Motael, Postu Administrativu Vera Crúz, Munisípiu Dili, Luis António Viegas, hateten Suku Motae, daudaun ne’e, hahú rejistu kandidatura ba programa Uma Kbiit Laek Plus (UKL+) ho tipu B nian, ho kategoria sira ne’e sei hetan kalen no pregu.
“Ohin loron 06 outubru, ami hosi Porgrama Nasionál Dezenvolvimentu Suku (PNDS) Postu Vera Crús, Suku Motael nian hahú halo rejistu ba kandidatura ba UKL+tipu B”, Luis António Viegas, dehan ba Agência Tatoli, iha nia servisu fatin, Motael, kinta ne’e.
Nia dehan kandidatura ka xefe família ne’ebé rejistu ona hamutuk 50 no sei submete hafoin halo verifikasaun baze aba kritériu.
“Iha ne’e ami rejistu ona xefe família hamutuk 50 maibé ida-ne’e sei submete ba verifikasaun hodi haree ba kritériu sira tanba kada suku sei hetan família 36 de’it”, Luis haktuir.
Hosi família 50 ne’e, nia dehan ekipa sei halo survei ba sira-nia rai ho uma no halo verifikasaun ba dokumentu, katak kandidatura ne’e merese atu hetan UKL ne’e ka lae.
“Nune’e ita presiza kandidatura nia eleitorál, fixa família no sertifikadu rai nian, karik seritifikadu tempu portugés ka indonézia nian no karik ema ne’e hela rai estadu maibé nia hela kleur entaun hatudu mós dokumentu hosi Terras Propriedade nian”, konklui.
Jornalista : Osória Marques
Editór : Zezito Silva
