VIQUEQUE, 20 outubru 2022 (TATOLI)-Administradór munisípiu Viqueque, Januario Soares ‘Bolly’, kinta ne’e, halao enkontru ho kompañia konstrusaun ba projetu Jardín 1959 no moru haleu edifisiu administrasaun munisípiu Viqueque. Inkontru ne’e hodi avalia progresu serbisu ba projetu rua refere.
“Ohin enkontru ami ho diretór kompañia rua halo avaliasaun ba progresu serbisu ba projetu rua ne’ebé dadaun la’o hela. Objetivu enkontru ne’e rona direta hosi kompañia implementadór projetu Jardín 1959 no moru haleu edifisiu munisípiu nian”, Januario Soares hateten ba jornalista Agência Tatoli, iha sala enkontru munisípiu, kinta ne’e.
Nune’e autoridade munisípiu Viqueque ne’e husu kompañia Darda no kompañia Peacefull hodi aselera prosesu serbisu ne’ebé seidauk finaliza. Tanba projetu rua ne’e implementasaun tinan 2021 nian nune’e tenke aselera lalais.
Projetu konstrusaun Jardín 1959 no moru hala’u edifísiu munisípiu Viqueque ne’ebé kontrola hosi Planeamentu Integradu Munisipál (PDIM) Viqueque no projetu rua refere hahú konstrusaun iha setembru 2021. Durasaun kontratu fulan neen hodi finaliza projetu refere.
Iha fatin hanesan Diretór PDIM Viqueque, Domingos de Carbalho Monteiro, hateten projetu rua hosi 2021 no implementasaun projetu iha fulan setembru 2021 tanba kestaun tempu ba verifikasaun dezeñu ne’ebé validasaun hosi Ajénsia Nasionál Dezenvolvimentu (ADN). Tan ne’e maka implementasaun projetu ne’e iha fulan setembru 2021.
“Tuir loos projetu rua ne’e implementa iha fulan juñu 2021, maibé ita akompaña kestaun tempu ba verifikasaun dezeñu maka foin implementa hahú iha setembru 2021 ne’e”, Domingos haktuir.
Nia enkoraja enjeneira hosi kompañia rua nian atu akompaña nafatin projetu la’o ho di’ak hodi aselera serbisu finaliza iha tinan 2022. Tanba, projetu rua ne’e tenki hotu iha tinan ida-ne’e
Dadaun ne’e progresu projetu jardín 1959 atinji ona 81.21% no moru haleu adiministrasaun munisípiu Viqueque atinji ona 78.8%.
Iha oportunidade ne’e Diretóra kompañia Darda Unip. LDA, Domingas Guterres, haktuir durante ne’e kompañia hasoru difikuldade konaba material. Tanba ne’e, maka projetu la’o tarde, maibé ba oin kompañia sei esforsu hodi finaliza projetu konstrusaun moru haleu adiministrasaun munisípiu Viqueque tuir tempu ne’ebe termina ona.
“Ami rekoñese durante ne’e ami-nia serbisu la’o tarde tanba ami hasoru difikuldade ba material ne’ebé lori hosi Dili. Tanba ne’e maka ami-nia serbisu la’o tarde, maibé ami sei esforsu an hodi finaliza ami-nia obra konstrusaun no sei hotu iha fulan ida-ne’e,” nia informa.
Enkuantu orsamentu ba konstrusaun jardín 1959 ho totál hamutuk $273.301,49 no moru haleu administrasaun munisípiu Viqueqeu ho montante hamutuk $233.346,66.
Partisipa iha enkontru evaluasaun ba projetu rua ne’e mai hosi Diretór kompañia Paecefull Unip.LDA no kompañia Darda UNIP. LDA, enjeneira hosi kompañia rua no akompañia hosi enjineru hosi PDIM munisípiu Viqueqeu.
Jornalista : Vitorino Lopes da Costa
Editor : Armandina Moniz
