VIQUEQUE, 08 dezembru 2022 (TATOLI)— Adiministradór postu adiministrativu Viqueque villa, munisípiu Viqueque, Duarte Brandão Soares, informa kontinua halo koordenasaun ho empreza internasionál COVEC hodi aselera serbisu konstrusaun ponte foun Buanurak hodi fasilita movimentasaun populasaun nian liuhosi transporte públiku no privadu.
“Tanba daudaun ponte tuan kotu ne’e difikulta tebes ba ita-nia komunidade no amesa ba transporte bá mai hosi Dili no Viqueque”, hateten Administradór postu ne’e ba Agência TATOLI, iha Viqueque vila, kinta ne’e.
Daudaun ne’e, nia dehan konstrusaun ponte foun Buanurak la’o hela, maibé serbisu maka la’o neineik loos, tanba ne’e husu atu aselera serbisu hodi labele difikulta ba movimentasaun populasaun nian.
Ho konstrusaun ponte ne’e, Autoridade lokál ne’e husu ba komunidade liuliu pasajeiru sira ne’ebé halo movimentu tenke kuidadu aan bainhira mota boot tuun lalika ultrapasa tanba bele fó ameasa ba vida. Daudaun Empreza COVEC hahú loke dalan ka ponte alternativa ba transporte sira, maibé seidauk finaliza.
Iha fatin seluk, Xefe Unidade Tránzitu Minisípiu Viqueque, Salvadór Guterres, informa rejista asidente tráfegu rua mak akontese iha mota Buanurak no iha mota Dilór.
“Tan ne’e, ha’u komunidade sira halo viajen tenke kuidade-an atu labele hetan asidente”, nia apela.
Jornalista: Vitorino Lopes da Costa
Editóra : Editór: Florencio Miranda Ximenes
