MALIANA, 05 Juñu 2026 (TATOLI) – Euforia atu simu Kopa Mundiál FIFA 2026 hahú sente daudaun iha Munisípiu Bobonaro, liuliu kapitál Maliana, ne’ebé komunidade balu hahú hasa’e bandeira selesaun favóritu sira iha uma oin, motorizada tum-tum no karreta hanesan parte husi preparasaun atu hasoru eventu futeból boot liu iha mundu.
Sidadaun Maliana, Juvinal Soares, informa atividade ne’e hatudu entusiazmu komunidade nian atu simu kompetisaun internasionál ne’ebé sei atrai atensaun ema millaun ba millaun iha mundu tomak.
Tuir nia, futeból la’ós de’it sai hanesan forma entreteinamentu, maibé mos bele hametin relasaun di’ak entre membru komunidade sira ne’ebé iha interese hanesan ba desportu.
Notísia relevante: PNTL komprometidu fó seguransa másimu ba Semana Oseánia no Kopa Mundiál
“Ami kesi bandeira iha motorizada, tum-tum, karreta no hasa’e iha ida-idak nia uma oin hanesan preparasaun atu hasoru Kopa Mundiál 2026. Ami fiar katak Kopa Mundiál bele lori dame ba ema hotu, tanba durante kompetisaun ne’e, ema barak sei fó nia konsentrasaun atu haree no apoia ekipa favóritu sira,” Juvinal informa ba TATOLI, iha Maliana, sesta ne’e.
Iha parte seluk, motorista tum-tum, Sabino Leite, hateten katak Kopa Mundiál 2026 sei sai kompetisaun ida ne’ebé atrativu no emosionante liu.
“Ami kontente no la sabar ona atu haree haree jogu sira hahú ona. Jogadór sira di’ak sira husi nasaun oioin sei partisipa iha kompetisaun ne’e. Ami hein katak jogadór sira lendáriu hanesan Messi, Cristiano Ronaldo no estrela futeból seluk tán sei marka prezensa iha torneiu ida-ne’e,” nia katak.
Bola-Mania, Sidónio de Jesus, manifesta katak sira senti anima tebes tanba kompetisaun ida bele dehan hanesan jogu ikus ba Jogadór Lendáriu na’in rua; Messi no Cristiano Ronaldo.
“Maski sira na’in-rua idade ona, maibé ami sei hakarak asiste nafatin sira na’in-rua nia jogu, tanba sira na’in-rua mak tinan 20-resin ona halo Futeból morin iha mundu, sira na’in-rua ne’e mós inspira jogadór barak iha mundu atu disiplina, no badinas treinu, ami mós fiar katak Jogadór foun sira Hanesan Yamal, Mbape, Vinicios Jr no jogadór seluk tan sei halo rame liután eventu mundiál ida-ne’e.”
Husi nasaun hirak-ne’e, nia halo predisaun katak Portugál mak sei sai vensedór, tanba mehi ikus ba Cristiano Ronaldo atu foti trofeu mundiál ne’e.
“Ita haree selesaun Portugál forte, Kapitaun CR7 ho nia ekipa sólidu, ha’u fiar katak nia sei hatudu vitória iha eventu ne’e hodi fó kontente ba fans Portugál iha mundu liuliu Timor-Leste,” nia fiar-an.
Reprezentante, Estudante Maliana, Fidelia de Jesus, fiar karak katak Kopa Mundiál FIFA 2026 sei lori ambiente ne’ebé nakonu ho alegria, unidade no espíritu desportivu no habelar tan domin ba futeból entre sidadaun sira iha rai-laran.
“Agora iha eskola, servisu fatin, merkadu, to’os-laran no fatin-fatin hotu ne’e, atu koñese malu ou lae ne’e hahú ko’alia de’it ona konaba bola, liuliu nasaun sira-nia fans ne’e, liuhusi Bola ne’e ita la koñese malu. Ezemplu ha’u lori bandeira España nia la’o pasiar ba merkadu, ida hetan ha’u dehan viva España, kopa mundiál nia di’ak iha ne’e tanba ema hotu kontenti,” nia dehan.
Kopa mundiál 2026 ne’e partisipa husi nasaun 48 ne’ebé sei hahú iha loron 12 fulan ne’e to’o lorom 19 fulan oin ne’ebé realiza iha nasaun Estadu Unidu Amérika, Méksiko no Kanadá.
Notísia relevante: PA Bobonaro husu komunidade labele uza subsídiu $200 ‘taru’ kopa mundiál
Jornalista: Sergio da Cruz
Editór: Evaristo Soares Martins
