BOBONARO, 12 dezembru 2022 (TATOLI) — Prezidente Autoridade (PA ) Munisipál Bobonaro, Ernesto de Oliveira Barreto, husu ba komunidade sira atu labele uza osan subsídiu uma-kain fim do ano $200 hodi ba joga ka ‘taru’ fali tuir ida-idak nia ekipa favóritu iha kopa mundiál períodu 2022 nian ne’ebé realiza iha Qatar.
Notísia relevante: Governu lansa pagamentu subsídiu $200 ba benefisiáriu 1,551 iha Holsa
“Agora daudaun ne’e kopa mundiál la’o hela, ema joga lakan-lakan ne’e dehan, ha’u Brazíl ou ha’u Portugál, taru $50 haan $30, ne’e labele, tanba osan ne’e imi-nia uza ba nesesidade loron boot hamutuk ho oan no bei-oan sira,” nia informa ba jornalista sira, hafoin lansa simbóliku subsídiu $200 ba komunidade sira, iha suku Holsa, segunda ne’e.
Autoridade munisípiu ne’e fó hanoin ba komunidade sira hotu di’ak liu uza osan ne’e ba atende nesesidade ne’ebé presiza, la’ós sadik malu ba joga lakon hotu osan ne’e.
“Karik sira uza osan ne’e ba buat seluk maka família sira keisa, ne’e automatikamente tenke hetan xamada, liuliu família sira-ne’ebé sei joven, tenke hanoin di’diak labele uza osan ne’e la tuir nia regra,” nia fó hanoin.
Reprezentante Komandante Komandu Polísia Munisípiu Bobonaro, Inspetór Xefe Fátima Motu-Mali, apela ba família hotu-hotu, atu labele gasta fali osan subsídiu ne’e ba sosa tua hemu lanu hodi kria instablidade iha fatin públiku.
“Imi hakarak sosa mós hemu iha uma, labele tur iha luron,” nia fó hanoin.
Komandante ne’e dehan, Komandu Polísia Munisipiu mós sei koordena ho Batallaun Orden Públika (BOP) kompañia Delta Soso, Maliana no FALINTIL-Forsa Defeza Timor-Leste (F-FDTL) postu destakamentu Tunubibi halo patrullamentu másimu atubele atua abitante ne’ebé ne’ebé tenta perturba orden públika.
“Hau fiar nan-aman sira la halo ida-ne’e, karik joven sira, ne’ebé kuidadu ita-boot sira-nia aan ba, karik loron boot ne’e hakarak goza ho família, entaun mantein seguransa hodi garante trankuilidade iha ita-nia munisípiu,” nia apela.
Notísia relevante: Governu hahú atribui subsídiu fim do ano $200 ba komunidade iha Dili
Jornalista : Sérgio da Cruz
Editór : Evaristo Soares Martins
