BOBONARO, 12 dezembru 2022 (TATOLI) – Governu liuhosi Ministériu Solidariedade Sosiál no Inkluzaun, segunda ne’e lansa pagamentu subsídiu uma-kain tinan nia rohan $200 ba benefisiáriu agregadu familiár hamutuk 1,551 ho valor orsamentu $310,200 iha suku Holsa, postu administrativu Maliana, munisípiu Bobonaro.
Subsídiu ne’e lansa simbolikamente hosi Prezidente Autoridade Munisípiu Bobonaro, Ernesto de Oliveira Barreto, ne’ebé prosesu pagamentu sei la’o iha postuAdministrativu Maliana ho totál suku hitu no postu administrativu Cailaco ho nia suku ualu.
Enkuantu postu administrativu sira seluk, hanesan Atabae, Balibo, Bobonaro no postu administrativu Lolotoe sei la’o tuir kalendáriu ne’ebé distribui ona.
Notísia relevante: MSSI husu membru família saláriu liu $500 rezeita simu subsídiu $200
Koordenadór Jerál pagamentu subsídiu tinan nia rohan ka fim do ano, munisípiu Bobonaro, Francisco Tilman, esplika pagamentu subsídiu ne’e nu’udar programa konjunta entre Ministériu Solidariedade Sosiál no Inkluzaun (MSSI) ho Ministériu Administrasaun Estatál (MAE).
“Ha’u atu hatete ba komunidade hotu katak, subsídiu ida uluk ne’e mai ita fó de’it, maibé ida agora ne’e rigorozu, sira-ne’ebé moras todan, ita-nia ekipa sei ba to’o uma ka bele mós to’o iha ospitál, ne’ebé ami la simu reprezentante, di’akliu xefe família ne’e mak mai, ka membru família ne’ebé mak atinje idade tinan 17 ba leten, lori eleitorál mai mak foin entrega osan ba nia,” nia hateten iha nia intervensaun iha sede suku Holsa.
Prezidente Autoridade Munisipál Bobonaro, Ernesto de Oliveira Barreto, agradese ba VIII governu lideradu Primeiru Ministru, Taur Matan Ruak, ne’ebé kria ona polítika atribui subsídiu fim do ano ba povu tomak.
“Ita agradese razaun ida tanba kada tinan funsionariu sira mak simu subsídiu ka gaji 13, maibé tinan ne’e reinu mos simu hotu subsídiu fim do ano, tanba desde ukun-aan kuandu iha Natál no tinan foun ema-ne’ebé iha osan ne’e oho manu, hahán di’ak, maibé sira-ne’ebé laiha tuur nonok de’it, entaun governu fó atubele goza iha loron boot ho família sira,” nia hateten.
Xefe suku Holsa, postu administrativu Maliana, António Santa Cruz, kondeira subsídiu ne’e bele halo komunidade sira kontente netik hodi selebra loron boot.
Maibé Santa Cruz mós preukupa oituan ho baze dadus governu nian, tanba xefe família balu mak naran rejista iha fixa família dezde tinan 2020 to’o 2021 maibé naran la inklui iha lista pagamentu atuál.
“Ha’u husu ba governu atubele haree fali naran sira-ne’e, nune’e bele hetan sira-nia direitu, tanba subsídiu ida-ne’e fó ba ema hotu, maibé ami nafatin agradese ba ekipa sira hotu tanba ho sira-nia esforsu orsamentu ne’e Prezidente Repúblika aprova ona no ohin ita konsege simu,” Santa Cruz katak.
Enkuantu serimónia lansamentu ne’e partisipa hosi Administradór Postu Administrativu Maliana, Tomás Lacu-Loe, reprezentante komandante PNTL munisípiu Bobonaro no prosesu pagamentu ne’e hetan seguransa hosi Ofisiál Polísia Suku (OPS).
Notísia relevante: Tékniku MSSI fó formasaun utiliza android ba ekipa pagamentu subsídiu $200
Jornalista : Sérgio da Cruz
Editór : Evaristo Soares Martins
