DILI, 01 fevereiru 2023 (TATOLI) – Governu aprova alterasaun dahuluk ba Dekretu-Lei númeru 3/2009, kona-ba Servisu Nasionál Intelijénsia nian (SNI), ne’ebé aprezenta husi Primeiru-Ministru, Taur Matan Ruak.
“Ho projetu dekretu-lei ne’e hakarak atu hasa’e kapasitasaun institusionál SNI nian, liuhusi reorganizasaun ninia estrutura no korrespondente sira kompeténsia, no adapta lais liu no konsentáneu [aproriada] ho dezafiu no ezijénsia daudaun ne’e nian”, Ministru Prezidensia Konsellu Ministru, Fidélis Magalhães, hatete hafoin reuniaun Konsellu Ministru, iha Palásiu Governu.
Aléinde ne’e, atu klarifika mós norma sira ne’ebé relasiona ho estrutura organizasionál no posibilita ho ninia diploma rasik katak pesoál SNI iha estatutu rasik no ho karreira espesiál, hodi haree ba ninia kualifikasaun di’ak, nune’e insentiva nia ba prestasaun di’ak hodi kumpre ninia misaun.
SNI mak servisu personalizadu ida Estadu nian iha responsabilidade ba produsaun informasaun ne’ebé kontribui ba salvaguarda independénsia nasionál, interese nasionál, seguransa esterna no garantia seguransa interna, prevensaun sabotajen, terrorizmu, espionajen, kriminalidade organizada no atos ne’ebé nia natureza bele altera ou destrui Estadu Direitu.
Jornalista: Antónia Gusmão
Editora: Maria Auxiliadora
