BOBONARU, 07 Jullu 2026 (TATOLI) – Komandu Polísia Nasionál Timor-Leste (PNTL) Munisípiu Bobonaru suspeita katak sidadaun estranjeiru na’in-rua husi Xina ne’ebé detidu ba alegada utilizasaun osan falsu $100 iha Bobonaru, halo uluk ona atividade hanesan iha Dili antes kontinua iha munisípiu ne’e.
Komandante PNTL Munisípiu Bobonaru, Superintendente Xefe Damião da Silva Correia, hateten suspeita ida-ne’e bazeia ba evidénsia CCTV no informasaun ne’ebé PNTL simu husi vítima balun iha Dili, hafoin suspeitu sira hetan kapturasaun iha Bobonaru.
“Ha’u fó hatene ona mós ba Komandu PNTL Likisá no Dili, tanba nia maluk xinés sira mós bainhira xinés na’in-rua hetan kapturasaun [iha Bobonaru] sira share hela ninia CCTV ne’ebé bá kompras iha Dili haruka mai. Sira mós hatene Xina ne’e mak [uza osan falsu $100]. Evidénsia CCTV akapta sira send mai ha’u cocokaan ema mak ida-ne’e nafatin”, nia informa ba jornalista sira.
Tuir nia, suspeitu sira uza modus hanesan mak sosa sasán iha kioske no loja oioin ho nota falsa $100. Iha Bobonaru rasik kioske lima mak sai vítima. Polísia mós identifika osan orijinál ne’ebé suspeitu lori hamutuk ho osan seluk, ho montante to’o $2.900, inklui moeda rupiah husi Indonézia no nota $100 tahan ualu.
Komandante Damião eslika katak membru Rezerva Intervensaun Rápida (RIR) PNTL Bobonaru kaptura sidadaun xineza na’in-rua ne’e iha loron sábadu (27/06/), hafoin simu keixa husi kioske na’in balun ne’ebé deskonfia katak suspeitu sira uza osan falsu sosa sasán iha fatin la hanesan.
“Komunidade sira mós matenek tanba ema hotu hateten agora osan $100 iha falsu, entaun sira hafuhu tuituir [xinés sira] bá sosa iha kioske seluk no sira husu tuir depois xinés sira sai tiha mak konfirma ba nia maluk [negosiante sira] dehan sosa nafatin ho osan tahan $100”, nia dehan
Komandante Damião relata katak ba kazu ne’e nia prosesu primeiru interrogatóriu realiza ona iha Tribunál Primeira Instánsia (TJP) Suai iha loron 30 Juñu. “Suspeitu sira detein iha sábadu no domingu. Segunda-feira ami lori bá aprezenta iha Ministériu Públiku. Agora, Tribunál Primeira Instánsia Suai deside atu aplika medida koasaun prizaun preventiva ba suspeitu sira”, nia informa.
Notísia relevante: Sidadaun xinés na’in-rua suspeitu ba uza osan falsu iha Bobonaru, vítima husu investigasaun kle’an
Atu prevene kazu ida-ne’e, PNTL fahe ona informasaun ba administradór postu administrativu, Ofisiál Polísia Suku (OPS), xefe suku no lideransa komunitáriu sira atu kontinua sensibiliza povu, liuliu kioske na’in sira no negosiante ki’ik sira atu haree didi’ak nota ne’ebé simu bainhira halo tranzasaun.
“Povu presiza kuidadu, tantu kalan komu loron. Karik ema ruma uza nota $100 atu halo kompras, tenke verifika didi’ak antes simu”, nia fó hanoin.
Sidadaun xinés na’in-rua ne’e utiliza motorizada tama-sai kioske no loja sira hodi sosa sasán ho uza osan falsu, liuliu iha tempu loraik no kalan.
Notísia relevante: PNTL: Osan millaun $4 aprendidu iha armazein Bidau Masau konfirmadu falsu
Jornalista: Sergio da Cruz
Editora: Maria Auxiliadora
