BAUCAU, 11 fevereiru 2023 (TATOLI) – Konferénsia daruak Kamara Komérsiu Indústria Timor-Leste (CCI-TL, sigla Portugés) rezulta José dos Reis ‘Noki’ eleitu nu’udar Prezidente iha Munisípiu Baucau.
Liuhosi konferénsia ne’ebé partispa hosi kongresista nain-150 avansa ho pakote úniku ne’ebé hili aklamasaun kandidatu José dos Reis ‘Noki’ nu’udar Prezidente CCI-TL munisípiu Baucau hamutuk ho estrutura no departamentu sira lidera CCI-TL ba períodu tinan-haat (2023-2027).
Prezidente CCI-TL eleitu, José Januari dos Reis ‘Noki’, kompremete sei hamrik iha oin hodi organiza, kapasita, promove emprezáriu sira, koalia iha oin hasoru injustisa, lidera iha oin atu defende emprezáriu Baucau oan iha kualker maneira.
“Ho konfiansa konsensuál ne’ebé fó ha’u sei hamrik iha oin atu sai defensór ka liña oin hodi defende, organiza, mobiliza no konfronta atu defende interese”, Prezidente CCI-TL Munisípiu Baucau, hateten iha Sentru Konvesaun Baucau (CCB, sigla portugés), sábadu ne’e.
‘Noki’ agradese ba seniór emprezáriu sira ne’ebé envolve mós veteranu hotu iha munisípiu Baucau fó ona konfiansa liuhosi konsensu hodi hili sai nu’udar Prezidente CCI Baucau ba períodu tinan-haat.
Kompromisiu Prezidente eleitu nian ne’ebé sei halao iha tempu badak mak hanesan sei establese sekretáriadu permanente hodi halao kna’ar lorloron nian, trasa planu programa inklui realiza enkontru regulár entre estrutura sira inklui rejista membru permanente CCI-TL Baucau.
“Ha’u fiar katak ho ita-nia amizade lideransa ne’e sei hatudu ninia rezultadu iha tinan-haat laran”, ‘Noki’ dos Reis akresenta.
Prezidente CCI-TL Baucau sesante, Estanislão Maria Quintas da Costa, hateten konferénsia ne’e realiza tanba ezijénsia hosi nasionál atu re-struturu iha munisípiu hotu atu bele iha mudansa liuliu bele atende ba nesesidade emprezáriu nian.
“Ha’u fiar ba prezidente atúal sei kumpre orientasaun hosi nasionál hanesan kompleta departamentu hotu iha tempu badak tanba iha funsaun importante atu bele hatene nesesidade emprezáriu sira nian”, Estanislão da Costa argumenta.
Durente Konferénsia ba daruak CCI-TL iha Baucau lidera hosi Prezidente meza Filomeno Brono hamutuk vise prezidente nain-rua sekretáriu meza nain-2 inklui observa hosi meza verifikasaun kompostu Jornalista, Sefope, Veteranu, jurista, ministériu turismu komérsiu indústria (MTKI) no Sosiadade sivil hosi munisípiu Baucau.
Tuir dadus atúal, tótal membru CCI-TL Baucau ne’ebé rejistu hamutuk emprezáriu 500 resin kompostu asosiasaun ualu inklui emprezáriu individu hosi postu admistrativu neen iha munisípiu Baucau.
Jornalista : Natalino Belo
Editór : Zezito da Costa
