BOBONARU, 02 Juñu 2026 (TATOLI)-Prezidente Autoridade Protesaun Sivíl (APC), Zesuínho dos Reis de Matos, hamutuk ho Autoridade Munisípiu Bobonaru entrega materiál rekuperasaun no orsamentu Mão de Obra ho kustu transporte $63.550 ba vítima dezastre naturál hamutuk uma-kain 87 iha Bobonaru.
Vítima sira ne’e mai husi postu administrativu Atabae iha família haat, Balibó sanulu, Bobonaru 18, Lolotoe lima, Maliana 29, no Kailaku 21.
Prezidente APC esklarese katak apoia ne’e atu rezolve no rekupera sasán neʼebé hetan danu, tanba ne’e husu ba benefisíariu sira atu uza materiál hirak ne’e tuir ninia funsaun hodi konstrui no reabilita fali uma ho kondisaun dignu no seguru.
“Ha’u lori Ministru Interiór no Sekretáriu Estadu nia naran husu deskulpa, tanba ita-nia prosesu mak hanesan ne’e duni. Loron, tinan no fulan barak, ha’u hatene ita-boot sira ne’e balun halo tiha ona uma. Husu ba inan-aman sira atu hasees-an husi fatin ne’ebé risku ba dezastre. Labele halo uma iha ema nia rai ou rai Estadu”, nia hateten iha serimónia entrega materiál ne’ebé realiza iha Zinájiu Maliana, ohin.
Sekretáriu Autoridade Munisípiu Bobonaru ba Asuntu Administrasaun no Finansa, Domingos da Costa, agradese ba Governu tanba bele responde ona preokupasaun vítima sira-nian maski tarde.
“Uma ne’ebé ahi-han, halo fali iha nia fatin, labele husik mamuk, nune’e ema hateten katak nasaun ne’e la taka matan ba nia povu, responsablidade nasaun nia atu halo fali uma, nune’e ita bele hela iha fatin dignu, hakmatek, maski uma ita halo ne’e ho orsamentu la to’o. Maibé, ne’e uma ida, mahon ida, halo karik labele tuir ita-nia hakarak, tuir forsa Governu nian”, dehan.
Komandante Operasaun Komandu Polísia Munisípiu Bobonaru, Inspetór Xefe José Lelo Bere, husu ba benifesiariu sira atu uza materiál no orsamentu tuir nia funsaun, tanba Governu kria programa ne’e atu hakmaan sira-nia sofrimentu.
“Osan ne’e labele ba halo fali lia, labele fó fali ba oan sira buka fali sorte, joga SDSB. Husu mós ba funsionariu APC tenke halo monitorizasaun fali ba materiál ne’ebé ohin fahe ne’e. Sira halo duni uma ka la’e, se la’e sasán sira ne’e bele para fali iha fatin seluk”, nia afirma.
Uma-kain hirak ne’ebé afeta husi dezastre naturál tinan 2024 no 2025 maioria ho tipu dezastre inséndiu no anin-sobu.
Notísia relevante: APC apoia materiál rekuperasaun ba vitima dezastre naturál 31 iha Bobonaru
Jornalista: Sergio da Cruz
Editora: Maria Auxiliadora
