BOBONARU, 30 Maiu 2025 (TATOLI)—Autoridade Protesaun Sivil (APC, sigla Portugés), tersa ne’e, entrega apoia materiál rekuperasaun ba vitima dezastre naturál hamutuk 31 iha munisípiu Bobonaru.
Notísia Relevante: APC apoia ona família afetadu dezastre naturál hamutuk 12
“Sira-ne’ebé mak hetan dezastre ne’e autoridade Protesaun Sivil, Estádu, Governu iha dever para atu bele rekupera sira-nia sasán ne’ebe hetan estragu iha dezastre,” Komandante interinu APC Munisípiu Bobonaru, Eusebio Fernandes da Cruz, informa ba jornalista sira, iha Jináziu Maliana.
Vitima hirak ne’ebé hetan apoia ho kategoria tolu kompostu husi kategoria aat totál ne’e kada uma kain simu zinku 50, besi baja 50, besi beton 50 no kompletu ho materiál konstrusaun seluk tan inklui osan $1.000.
Kategoria aat naton ne’e simu zinku tahan 50, besi baja 50 no osan Mão de Obra $750, no kategoria aat kmaan ne’e simu zinku tahan 50 no osan mao de Obra $450.
Nia konfirma, tuir dadus benifisiariu ne’ebé hetan apoia rekuperasaun ne’e hamutuk 33 maibé ohin distribui ne’e ba de’it uma kain 31, tanba vvítima na’in-rua (2) simu ona antes iha loron aniversáriu APC nian.
Apoia ne’e, sei distribui fazeadamente ba totál uma- a’in 175 ne’ebe afetadu ba dezastre naturál hahú husi 2024 to’o agora.
“Ita haree husi orsamentu ne’e labele aloka dala ida, tanba ne’e Timor laran tomak la’ós iha Munisípiu Bobonaru de’it. Ne’e presiza osan boot maibe sira iha direitu hetan hotu. Ami, APC prontu apoia maibé ninia kriteria obrigatóriu mak sasán sira-ne’e tenke halo. Estadu fó para atu halo uma, labele halo fali buat seluk, faan fali ka fó fali ema. Entaun, sira simu ohin loron, fulan ida ami tuir kedas ba monitoriza, se la halo ida-idak ba hatán iha tribunal,” nia dehan.
Diretór Servisu Munisipál Protesaun Sivil no Jestaun Dezastre Naturál, Armindo Vicente, esklarese apoia ne’e atu rezolve no rekupera sasán ne’ebé hetan estragu, tanba ne’e husu ba vitima sira atu uza materiál hirak ne’e tuir ninia funsaun hodi konstrui no reablita fali uma.
Nia afirma, diresaun Servisu Munisipál Protesaun Sivil no Jestaun Dezastre Naturál Munisípiu Bobonaru sei servisu hamutuk ho ekipa APC atu maksimiza monitorizasaun iha terrenu.
“Ha’u ko’alia hanesan ne’e, tanba dalaruma dezastre liu tiha fulan idaka rua família balun halo tiha uma, tanba hein apoia rekuperasaun ne’e kle’ur. Ezemplu, hanesan agora materiál ne’e foin to’o mai, balun dehan ha’u nia uma di’ak tiha ona no materiál sira-ne’e atu halo tan saida, ida-ne’e mak ita presiza kontrola,” nia hateten.
Tuir observasaun Jornalista Tatoli iha terrenu nota katak maioria vitima dezastre naturál sente kontente ho apoia ne’e maske hein kle’ur.
Notísia Relevante: Autoridade Bobonaro apoia vítima dezastre naturál iha Lolotoe
Jornalista : Sergio da Cruz
Editor : Cancio Ximenes
