iklan

HEADLINE, KAPITÁL

APC apoia ona família afetadu dezastre naturál hamutuk 12

APC apoia ona família afetadu dezastre naturál hamutuk 12

Funsionáriu Autoridade Protesaun Sívil (APC, sigla portugés) hatudu teatru prevensaun mitigasaun no halo prosesu evakuasaun komunidade sira hosi situasaun risku ba dezastre iha ámbitu komemorasaun loron mundiál ba risku dezastre naturál. Imajen Tatoli/dok.

DILI, 16 janeiru 2025 (TATOLI)—Governu liuhosi Xefe Relasaun Esterna iha Ajénsia Protesaun Sivíl (APC-sigla portugés), Nélson Nunes Orleans, hateten família afetadu dezastre naturál hamutuk 12 hosi 95 hetan ona apoiu husi APC.

“Ajénsia Protesaun Sivíl Munisipál verifika kedas dadus kona-ba vítima afetadu sira-nia uma. Husi verifikasaun ne’e, xefe família 12 mak hetan ona apoiu uluk,” Nélson Orleans dehan ba jornalista sira liuhusi konferénsia imprensa iha edifísiu APC, Caicoli, Dili, kinta ne’e.

Nia esplika katak APC ho nia parseiru sira fornese asisténsia emerjénsia iha forma ai-han, sasán no sei kontinua hala’o levantamentu detalladu kona-ba família sira seluk ne’ebé lakon sasán no estragu.

“Kategoria estragu sira sei rejista iha sistema hodi hetan apoia rekuperasaun iha tempu badak,” Nélson tenik.

Nélson haktuir munisípiu ne’ebé afetadu ba dezastre ne’e hamutuk hitu kompostu husi Ainaro, Baucau, Ermera, Lautém, Liquiçá, Manufahi, no Bobonaro.

“Husi loron 6 to’o 13 janeiru 2025, iha área Timor-Leste, tipu dezastre ne’ebé rejista husi APC mak uma haat hetan inundasaun, uma ida hetan sunu, uma 13 hetan afetadu husi anin boot, uma rua hetan kona husi rai-monu no ema na’in ida mate,” nia subliña.

Jornalista: Felicidade Ximenes

Editór: Xisto Freitas da Piedade

iklan
iklan

Leave a Reply

iklan
error: Content is protected !!