BOBONARO, 30 janeiru 2024 (TATOLI) – Autoridade Munisípiu Bobonaro liuhosi Diresaun Servisu Munisipál Protesaun Sivíl no Jestaun Dezastre servisu hamutuk ho Autoridade Protesaun Sivíl (APC, sigla portugés), tersa ne’e fó apoia emerjénsia bá vítima dezastre naturál iha postu administrativu Lolotoe ne’ebé sira-nia uma hetan estragu hafoin akontese udan no anin-boot.
Diretór Servisu Munisipál Protesaun Sivíl no Jestaun Dezastre Munisípiu Bobonaro, António Soares, esplika vítima sira-ne’ebé hetan apoia hamutuk uma-kain 18 mai hosi suku tolu hanesan Lupal, Opa no suku Deudet.
Apoia ne’ebé oferese hanesan ai-han food item kompostu hosi foos, supermi, biskuit, ikan lata, mina goreng no susu-been. Nune’e mós sasán non food item hanesan, bikan, kanuru, kopu, manta, balde no sasán seluk tán.
Notísia relevante: APC alerta ba komunidade Bobonaro hadook-aan hosi fatin risku
“Buat ida dezastre naturál ne’e la’ós ita mak planu, entaun ita mai apoia oinsá mak atu halo todan ne’ebé mak komunidade sente ne’e menus, signifika katak governu prezensa iha komunidade nia leet bainhira sira hetan susar,” nia informa bá jornalista sira iha sede suku Lupal.
Diretór António ne’e informa, bazea ba dadus ne’ebé sira hetan hosi autoridade lokál sira katak,vítima dezastre naturál iha postu administrarivu Loloto’e hamutum uma-kain 24, maibé hafoin ekipa sira tún ba terrenu identifika uma neen la prienxe kritéria tanba kalen tahan ida no rua de’it mak anin sobu.
Nia hatutan, hosi totál dadus ne’e ekipa sira idenitifika iha uma 10 mak hetan estragu grave no prienxe kritéria atu hetan tán apoia rekuperasaun iha tempu tuir mai.
“Ami hakarak rekomenda ba xefe suku no xefe aldeia sira foun, katak tuir kritéria uma kalen tahan ida ka rua mak anin sobu, ita hatoman povu sira na’in taka rasik labele hein governu, agora sira-ne’ebé mak todan hetan estragus totál ita fó apoia, se ita verifika kalen tahan ida rua mak anin loke ne’e ita fó apoia, ne’e labele tanba lei la fó dalan,” nia katak.
Xefes uku Lupál, Gabriel de Jesús, agradese no apresia servisu hosi ekipa Protesaun sivíl ne’ebé konsege halo intervensaun rápida, maske kondisaun no situasaun udan la permite.
“Ami sente hansan intervensaun ida-ne’e mais rápida, tanba depois akontesimentu besik semana ida hetan ona intervensaun hodi mai apoia emerjénsia oinsa ita bele apoia netik ita-nia komunidade ba iha dezastre,” nia katak.
Vitima dezastre Naturál hosi aldeia Lupl-Taz, suku Lupal, José Gusmão, konsidera apoia refere natoon ba sira atubele atende ba nesesidade loron balu no nia espera sei hetan apoia rekuperasaun hosi governu lokál.
“Ha’u-nia uma ne’e anin sobu totál iha 27 janeiru, agora ha’u buka ona rai foun atu halo uma, tanba ha’u-nia uma ne’e rai halai nakfera hotu, ami hela ladi’ak tenke buka fatin foun,” nia hateten.
Enkuantu dadaun ne’e ekipa hosi protesaun sivíl munisípiu Bobonaro no APC kontinua halo verifikasaun dadus iha terrenu ba vitima sira-ne’ebé uma hetan estragu hosi dezastre naturál no tuir planu sei fó apoia mós bá vítima sira iha suku seluk ne’ebé identifikadu ona.
Notísia relevante: Eletrisidade iha Lolotoe mate semana ida ona
Jornalista: Sérgio da Cruz
Editór: Evaristo Soares Martins
