BOBONARO, 10 janeiru 2023 (TATOLI)-Relasiona ho akontesimentu udan-boot tersa (09/01) ne’e, Komandante Autoridade Protesaun Sivíl (APC sigla Portugués) Munisípiu Bobonaro, Inspetór José Lelo Bere, alerta ba komunidade sira atu hadook-aan hosi fatin risku sira hanesan mota-ninin no foho-lolon sira hodi prevene hosi dezastre naturál.
Tuir nia, ho akontesimentu dezastre naturál ne’e situasaun jerál iha munisípiu Bobonaro la’o di’ak hela ka seidauk akontese inundasaun ruma, maibé komunidade sira presiza antesipa bainhira tempu udan.
“Tuir lei ita tenke hela metru 500 hosi mota, ne’ebé ha’u husu ba komunidade sira, atu hadook bainhira tempu udan, tanba dezastre ne’e mai la fó hatene ita, entaun ita tenke antisipa tempu udan atu viajen, ba too’s la’o tenke haree, karik mota-bo’lot labele tenta hakur, tanba ne’e rizku la halimar ba ita-nia vida,” nia informa ba Jornalista sira iha Maliana, kuarta ne’e
Komandante ne’e informa, fatin risku sira iha munisípiu Bobonaro mak hanesan iha postu administrativu Cailaco ne’ebé tinan-tinan sempre akontese inundasaun hodi estraga komunidade nia uma no plantasaun.
Alende ne’e ida iha postu administrativu Atabae iha parte Surilaku ninian, no aldeia Lotan, suku Batugade, postu administrativu Balibo ne’ebé tinan kotuk sofre inundasaun.
“Ita husu ba autoridade lokál koordena ho sira bele hadook-aan tiha hosi mota-ninin, evakua ba fatin seguru, hanesan sede suku iha parte seluk,” nia informa.
Bainhira akontese dezastre naturál, fatin ida mak iha Gor Maliana, ida tún ba iha armazein Soso, fatin temporáriu ba ita halo evakuasaun, karik akontese dezastre naturál, liuliu inundasaun.
Nia husu ba parte hotu-hotu, atu servisu hamutuk ho ekipa APC hodi evakua no salva komunidade sira, bainhira akontese inundasaun.
Notísia relevante: SEPS apoia materiál konstrusaun ba uma-kain 51 iha Bobonaro
Jornalista: Sérgio da Cruz
Editór: Evaristo Soares Martins
