MALIANA, 14 setembru 2023 (TATOLI) – Sekretáriu Estadu Protesaun Sivíl (SEPS), Domingos Mariano Reis, kinta ne’e apoia materiál konstrusaun ba uma-kain 55 iha munisípiu Bobonaro, ne’ebé sai vítima ba dezastre naturál iha tinan 2022.
Uma-kain 51 ne’e komposta hosi estragu totál 21, natoon 10 aat-kmaan 27 no materiál konstrusaun ne’e distribui mak hanesan, simentu, kalen, besi baja, beton, pregu no meteriál konstrusaun sira seluk tán.
Notísia Relevante:SEPS sei distribui 17 viatura ba APC apoia servisu Bombeiros
“Husu inan-aman sira, labele halo uma iha fatin ne’ebé risku, rai-halai, besik ai-hún boot sira, besik mota-ninin, besik tasi-ibun sira, iha foho ida-ne’ebé aas liu, ne’e risku ba ita-boot sira, husu muda ba fatin ne’ebé seguru,” nia apela iha Jinájiu Maliana.
Governante ne’e mós husu ba Autoridade Munisípiu Bobonaro no Polísia Nasionál Timor-Leste atu orienta xefe suku no Ofisiál Polísia Suku (OPS) atu kontrola benefisiáriu sira.
“Sasán simu ona tenke halo imi-nia uma tuir saida mak Governu fó, atu ita-boot sira bele hela iha fatin ne’ebé dignu hanesan mós maluk sira seluk,” Sekretáriu Estadu Mariano katak.
Sekretáriu Autoridade Munisípiu Bobonaro, João de Fátima do Carmo, lori benefisiáriu sira-nia naran agardese ba IX Governu tanba apoia ona apoia rekuperasaun maski hein kleur.
Adjuntu Prezidente Autoridade Munisípiu Bobonaro ne’e mós apela ba benefisiáriu sira atu utiliza materiál hirak-ne’e hodi rekupera uma ne’ebé hetan estragu.
“Labele ba fa’an fali ka fó fali ema seluk, orsida ne’e ita-boot sira kontra lei, tanba ita-nia maluk barak mós daudaun ne’e hetan hela dezastre iha fulan hirak ba kotuk mós presiza, entaun husu a uza sasán tuir regra,” nia fó hanoin.
Alende hetan apoia rekuperasaun, vítima sira mós hetan osamentu ho kategória estragu totál sei hetan ho montante $150 no ba transporte no osan mão de obra $850.
Nune’e mós aat-natoon $150 no ba transporte $600 ba mão de obra, aat-kmaan simu $150 no transporte no $400 ba mão de obra.
Notísia relevante: SEPS apoia materiál rekuperasaun ba vítima dezastre naturál iha Lour
Jornalista : Sérgio da Cruz
Editór : Evaristo Soares Martins
