SEPS sei distribui 17 viatura ba APC apoia servisu Bombeiros
DILI, 06 juñu 2023 (TATOLI) – Sekretáriu Estadu Protesaun Sivil (SEPS), Joaquim Gusmão, hateten SEPS sei apoia karreta foun hamutuk unidade 17 ba Autoridade Protesaun Sivil (APC, sigla portugés) ho objetivu atu bombeiros bele uza hodi halo servisu loroloron.
“Ha’u hanoin semana ida ne’e ita sei fahe karreta hamutuk unidade 17 ba ita-nia Autoridade Protesaun Sivl. Viatura sira ne’ebé ita sei fahe ne’e atu apoia servisu bombeiros nian loroloron”, Joaquim Gusmão hateten ba jornalista sira iha Timor Plaza, tersa ne’e.
Nia esplika, viatura sira ne’ebé SEPS sei distribui ba APC iha tempu badak atu fó ba servisu bombeiros iha munisipiu hotuhotu, atu bele uza hodi ajuda pesoál servisu bombeiros munisípiu sira.
“Ita halo akizasaun ne’e iha faze rua, ida mak viatura hamutuk 17 ne’ebé mak ita sei fahe iha semana ida ne’e no faze daruak iha karreta hamutuk unidade 10 mak sei mai, ne’e kompostu hosi karreta Auto-Tanke neen no Auto-Eskada ida, ne’e sei mai iha fim fulan juñu ne’e. Totál viatura sira ne’ebé ita hola ne’e ho montante millaun $3-resin ho Orsamentu Jerál Estadu (OJE)”, governante ne’e hateten.
Joaquim Gusmão hateten, akizaun ba viatura hamutuk 17 ne’e ne’e liuhosi konkursu públiku ne’ebé halo hosi Ministériu Interiór, enkuantu viatura 10 iha faze daruak nian ne’ebé sei mai iha fim fulan juñu ninian konkursu halo iha Komisaun Nasionál Aprovizionamentu (CNA, sigla portugés).
Tuir nia, Governu hakarak halo modernizasaun ba viatura servisu bomebeiros nian, tanba ne’e mak Governu komprometidu atu halo akizasaun sira atu haforsa servisu Autoridade Protesaun Sivil.
“Ba oin ita kontinua halo akizasaun ba karreta ba ita-nia Autoridade Protesaun Sivil, liuliu ba bombeiros atu bele haforsa servisu bombeiros nian iha munisípiu”, nia koklui.
Jornalista: Natalino Costa
Editór : Zezito Silva
