MALIANA, 13 jullu 2023 (TATOLI) – Sekretáriu Estadu Protesaun Sivíl, Domingos Mariano Reis kinta ne’e apoia materiál rekuperasaun ba vítima afetadu dezastre naturál hamutuk uma-kain hitu hosi Aldeia Olo-Olo no Tasgolo, suku Lour, postu administrativu Bobonaro, munisípiu Bobonaro.
“Ha’u husu labele fa’an no tenke harii uma, Governu iha komitmentu ajuda ita-boot sira, maibé ita-boot sira tenke halo duni, ba ita-bot sira- nia família, atu família sira hela iha fatin ne’ebé dignu, saudável no seguru,” nia ko’alia iha Jináziu Maliana.
Notisia Relevante:Governu apoia ona vítima dezastre naturál iha Lour no hetan apoia rekuperasaun tuir mai
Ezekutivu ne’e mos apela ba autoridade lokál sira atu kontrola no halo suspervizaun ba materiál hirak ne’e nune’e vítima afetadu sira bele hari fali uma foun.
Nune’e iha loron hirak nia laran, governante ne’e hamutuk ho ekipa Autoridade Protesaun Siviíl dezeloka kedas ba terrenu hodi observa situasaun reál komunidade enfrenta iha terrenu no orienta ekipa APC fó kedas apoia emerjensia iha Same Alas, Zulo Covalima no Lour, munisípiu Bobonaro.
Iha loron tersa (12/07) entrega ona apoia rekuperasaun ba vitima afetadu sira iha Zulo, munisípiu Covalima hamutuk uma-kain 57 no ohin kinta ne’e fó apoia tán ba uma-kain hitu hosi suku Lour, postu administrativu Bobonaro, munisípiu Bobonaro atubele ajuda konstrui fali sira nia uma.
Nune’e sei kontinua desloka ba Same Hola-Rua atu fó apoia emerjensia ba vitima sira no halo levatamentu dadus ba uma sira ne’ebé hetan estragu.
“Xefe suku no xefe aldeia sira haree rai ne’ebé mak di’ak hodi harii sira-nia uma, sé lae tinan ida mai fali rai halai nafatin, ita-boot sira vítima nafatin governu apoia nafatin, entaun tanba ita ema barak, sidadaun barak entaun presiza apoia mos sira seluk,” nia fó hanoin.
Prezidente Autoridade Munisípiu Bobonaro, Ernesto de Oliveira Barreto, konsidera esforsu no intervensaun ne’ebé Governu da-sia halo rápidu tebes.
“Ami foin ba iha sábadu, eselénsia promete dehan sesta, maibé realidade la to’o sesta ohin materiál to’o mai, ita agardese ba ekipa tomak,” nia agradese.
Vítima dezastre naturál hosi Aldeia Olo-olo, Domingos dos Santos, sente kontenti no agardese ba esforsu governu liuliu sekretaria Estadu Protesaun Sivil, tanba kompre duni nia promesa.
“Ami prontu kumpre orden ne’ebé maka hato’o hosi sekretáriu estadu, karik fatin ne’ebé mak fó ona risku ba komunidade, se la halo uma ka konstrusaun uma tenke sees hosi fatin ne’e duni,” nia katak.
Vítima ne’ebé hetan apoia mai hosi kategoria rua, komposta hosi estragu grave uma-kain lima ne’ebé kada família sei hetan simentu saka 50, kalen tahan 50, besi medida 6X4 lolon 24, média 5X10 lolon 25, besi beton 10 mili lolon 30 no mili ualu lolon 30 no sasán seluk tán inklui osan mão de obra $850 no transporte $1,50.
Enkuantu ba vítima uma-kain rua ne’ebé nia uma hetan estragu kmaan hetan kalen 50, pregu no osan mão de obra $450 on osan transporte $150.
Notísia relevante: Dezastre naturál estraga uma 21 no estrada iha Lour
Jornalista: Sérgio da Cruz
Editór: Evaristo Soares Martins
