Dezastre naturál estraga uma 21 no estrada iha Lour
BOBONARO, 05 jullu 2023 (TATOLI)-Hafoin akontese udan-boot loron tolu, hahú husi loron domingu (01/07/23) to’o tersa loron 04/07/23 nee rezulta uma 21 mak estragu no estrada iha suku Lour, postu administrativu Bobonaro, munisípiu Bobonaro.
Xefe suku Lour, Miguel Gomes Lopes, informa, uma-kain 21 ne’e mai hosi aldeia Tasgolo hamutuk uma lima no restante pertense hotu iha aldeia Olo-olo.
Notísia relevante: Pesoál saúde iha Lour uza motorizada tula bee-moos
“Ha’u simu dadus bazea ba observasaun hosi xefe aldeia, depois ha’u rasik tún direita ba fatin akontesimentu identifika katak kauze uma-kain ne’ebé eziste iha aldeia Olo-olo ne’e totalmente, maibé identifika iha aldeia Tasgolo mós uma lima mak hetan estragu, nune’e mós posiblidade merkadu ne’ebé estabelese iha suku Lour ne’e labele uza,” nia informa ba Agência Tatoli liuhosi telefónika, kuarta ne’e.
Daudaun ne’e xefe suku no xefe aldeia sira buka hela fatin seguru ida hodi asegura abitante afetadu sira.
Akontesimentu ne’e nia parte informa direita ona ba parte autoridade Protesaun Sivíl Munísipiu Bobonaro.
“Até a data sira seidauk to’o iha fatin akontesimentu, maibé ha’u simu imformasaun katak agora sira mai ona iha dalan, lori ho apoia emerjénsia atu fó ba komunidade afetadu sira,” Xefe suku Miguel katak.
Alende uma, autoridade lokál ne’e relata, komunidade sira nia ai-haan iha to’os kuaze hetan estragu, maibé afeta maka’as liu ba estrada ligasaun hosi suku ba aldeia.
Nia fó-sai katak, ho akontesimentu refere, provizoriu movimentu públika ligasaun hisi suku Lour ba suku Sibuni no Molop paradu.
Ligadu hosi akontesimentu refere, xefe suku Miguel husu ba Governu kompetente liuliu Ministériu Obra Públika atu halo intervensaun imediata.
“Governu foun se bele orienta IGE atu hola alternativu ida-ne’ebé di’ak, hodi halo normalizasaun ba kondisaun estrada ne’e ho urjentemente, tanba ita-nia komunidade sira presiza hetan tulun hosi ita-boot sira,” nia sujere.
Suku Lour iha aldeia haat mak hanesan Tazgolo, Helikei, Olo-Olo no aldeia Galitas ho totál populasaun 1,440, komposta hosi feto 725 no mane 725 mai hosi uma-kain 200 ho xefe família 315.
Notisia relevante: Xefe suku Miguel ezije EDTL aselera projetu eletrifikasaun iha Lour
Jornalista: Sérgio da Cruz
Editór: Evaristo Soares Martins
