Xefe suku Miguel ezije EDTL aselera projetu eletrifikasaun iha Lour
BOBONARO, 01 marsu 2023 (TATOLI)-Xefe suku Lour, postu administrativu Bobonaro, munisípiu Bobonaro, Miguel Lopes Gomes, husu Eletrisidade Timor-Leste, Empreza Públika (EDTL,E.P), atu aselera projetu eletrifikasaun ba aldeia tolu iha suku refere tanba tinan 20 ona komunidade sira seidauk asesu enérjia elétrika.
Nia haktuir, relasiona ho preokupasaun ne’e hanesan lideransa komunitária hato’o beibeik oedidu no pedidu ikus submete ba iha tinan 2021 no iha loron 30 fulan-juñu tinan 2022 Prezidente Konselu Administrasaun EDTL,E.P, Paulo da Silva, konsege hatuni despaxu aprovasaun ba projetu eletrifikasaun iha suku refere.
Notísia relevante: Xefe suku Lour konsidera Governu insentiva $250 lori kontente no tristeza
“Despaxu iha ona ami, maibé até data ami la hatene nia prosesu implementasaun to’o ona iha-ne’ebé, ami seidauk hatene, tanba ne’e mak lori komunidade suku Lour nia halerik ida-ne’e nafatin ezije ba Prezidente EDTL,E.P, se bele karik prosesu ida-ne’e aselera ba, tanba dezde independénsia to’o agora komunidade sira halerik tebes ba eletrisidade,” nia informa ba Tatoli, iha Maliana, kuarta ne’e.
Xefe suku Miguel fundamenta, hafoin aprovasaun hosi EDTL,E.P ne’e atu instala liña eletrifikasaun kobre aldeia haat iha suku Lour Tomak, maske aldeia ida asesu ona enerjia elétrika iha tinan hirak liubá.
“Tuir ha’u-nia hatene projetu eletrifikasaun ba suku Lour ne’e sei zero, seidauk implementa, tanba EDTL foin lalais ne’e implementa projetu boot ida ba suku Ai-Asa, entaun iha altura ne’ebá sira-nia ai-rin liu iha komunidade suku Lour, aldeia Tas-Golo, ne’e mak komunidade sira halo impedimentu ho razaun ai-rin sira-ne’ebé liu iha to’os laran estraga komunidade nia ai-horis oinoin. Ikus mai governu ho kompañia ne’ebé kaer obra ne’e fó solusaun ba aldeia ida afetadu ne’e, entaun konsege distribui eletrifikasaun ba aldeia ida-ne’e,” nia katak.
Nia haktuir, foin lalais ne’e mós komunidade aldeia Heli-Kei, hola inisiativa rasik kontribui osan sosa fiu depois bolu tékniku EDTL,E.P halo instalasaun eletrisidade ba uma-kain hitu liga hosi aldeia Tas-Golo.
Iha momentu ne’ebá autoridade lokál komposta hosi xefe suku ho xefe aldeia koko halo impedimentu ho razaun tanba ai-rin sira ne’ebé hakoi la tuir regra tanba uza besi baja no au bele fó risku ba ema-nia vida.
Tuir dadus suku Lour iha aldeia haat mak hanesan, Tas-Golo, Heli-Kei, Olo-olo no Gali-Tas ho totál uma-kain ne’ebé seidauk asesu enérjia elétrika hamutuk 112.
Notísia relevante: Ministériu Saúde ‘abandona’ postu saúde Lour
Jornálista: Sérgio da Cruz
Editór: Evaristo Soares Martins
