Pesoál saúde iha Lour uza motorizada tula bee-moos
MALIANA, 27 marsu 2023 (TATOLI) – Besik tinan ida ona pesoál saúde na’in-rua komposta hosi efermeira ida no pesoál saúde públika ida, ne’ebé destaka iha postu saúde suku Lour, postu administrativu Bobonaro, munisípiu Bobonaro, hola inisiativa utiliza sira-nia trasporte rasik ba kuru bee-moos hodi lalin enxe hari’is-fatin uza ba nesesidade kada loron iha oras serbisu.
Xefe suku Lour, Miguel Gomes Lopes, haktuir atendimentu ba komunidade hahú iha fulan-setembru 2022, kompleta ho dormitóriu médiku no moru protesaun, maibé seidauk halo instalasaun baa bee-moos.
Notísia relevante: Ministériu Saúde ‘abandona’ postu saúde Lour
“Médiku sira hela atu tama ona ba tinan ida, maibé bee-moos ne’ebé sira utiliza ita bele dehan, kuitadu loos, tanba uza sira-nia transporte rasik mak tenke mai lalin iha bee-matan ho distánsia kuaze kilómetru ida, sira rasik mak lalin, kuandu tempu laiha, sira haruka ema mak lalin depois mak fó osan ba ema-ne’ebé lalin bee ne’e,” nia informa ba Tatoli, iha Maliana, segunda ne’e.
Líder komunitária ne’e hateten, iha tinan 2021 liubá molok pesoál saúde sira koloka mai, autoridade suku sira buka meiu hodi serbisu hamutuk ho parseiru UNDP ba survey bee-matan ida iha aldeia Ologomon atu dada bee mai hodi fornese ba postu saúde refere, maibé la konsege implementa tanba kestaun distánsia.
Situasaun ne’e akontese dala barak médiku sira kestiona no husu beibeik parte xefe suku no xefe aldeia sira, maibé só bele responde de’it, katak buat hotu-hotu liga fali ba prosesu, tanba autoridade lokál só bele hato’o de’it preokupasaun hirak-ne’e liuhosi proposta.
“Até data laiha responde, ha’u sente triste oituan tanba ne’e mak hanesan autoridade rekomenda ba parte kompetente, liuliu Ministériu Saúde atubele haree asuntu sira-ne’e, tanba asuntu ida-ne’e importante atu salva povu nia vida, entaun saúde ita tenke tau priodiade,” nia katak.
Diretór Servisu Saúde Munisípiu Bobonaro, João Barreto Cardoso, koalia ona ho Servisu Água no Saneamentu no Bee Timor-Leste, Empreza Públika (BTL,E.P) munisípiu Bobonaro maibé seidauk bele responde tanba lokalidade postu saúde ne’e dook hosi rekursu bee-matan.
“Iha bee balun iha bairru sorin liubá maibé ne’e iha okos fali, kuandu atu dada fali sa’e mai postu saúde ne’e presiza rekursu boot, entaun temporáriu meiu ne’ebé ami halo maka, ami buka ema ruma, kuandu kolega sira ba servisu bee-laiha, ami selu membru komunidade ba kuru ho jerigen mai ense iha tanki, depois bee ne’e mamuk nafatin aluga ema kuru,” nia klarifika.
Diretór Joao akresenta, meiu hirak-ne’e mós dalaruma paradu tanba laiha orsamentu, maske alokasaun orsamentu anuál natoon hela atu responde ba preokupasaun hirak-ne’e.
“Médiku na’in-rua, ida saúde públika ne’e ema suku Lour be di’ak hela, maibé parteira ne’e ema hosi suku seluk, entaun dader ba loraik tenke fila tanba bee laiha, maibé ho kondisaun mínimu ne’ebé ita iha, ita tenta nafatin presta serbisu saúde ba ita-nia komunidade,” diretór ne’e dehan.
Enkuantu suku Lour iha aldeia haat mak hanesan Taz-Golo, Heliquei, Olo-Olo no Gali-Taz, ho totál populasaun tuir dadus tinan 2022 hamutuk na’in-1,394, komposta hosi feto na’in-707, mane na’in-687, ho totál uma-kain 309.
Notísia relevante: MS ezekuta ona 27,2% OJE 2022 iha trimestre dahuluk
Jornalista : Sérgio da Cruz
Editór : Evaristo Soares Martins
