LOLOTOE, 30 janeiru 2024 (TATOLI)-Enerjia elétrika iha postu administrativu Lolotoe, munisipiu Bobonaro, mate semana ida resin ona seidauk lakan.
Xefe suku Lupal, postu administrativu Lolotoe, Gabriel de Jesús, informa eletrisidade refere mate kuaze postu administrativu Loloto’e laran tomak hahú hosi loron 21 fulan-janeiru ne’e hafoin akontese udan no anin boot.
Notísia relevante: EDTL Bobonaro esforsu rezolve ahi mate-lakan
“iha dia 10 to’o dia 20 janeiru ne’e EDTL kontrola hela, maibé depois ida-ne’e anin boot halo ahi mate to’o agora, semana ida liu ona seidauk lakan,” nia informa ba Jornalista sira, iha sede suku Lupal, tersa ne’e.
Lideransa komunitária ne’e hatutan, problema eletrisidade refere afeta maka’as ba atividade komunidade nia iha tempu loron no kalan.
“Ha’u-nia komunidade iha-ne’e uza zeleira, kuandu la asesu ba ahi telemovel sira-ne’e mate hotu, ita lakon informasaun, labarik sira atu estuda mós ladi’ak, ne’ebé husu ba EDTL atu halo kontrolu iha tempu badak atubele asesu fila-fali ahi,” Xefe suku ne’e relata.
Negosiante Verónica Fernandes, sente triste tanba hafoin ahi mate sira-nia sasán kioske no sasán electrónika balu hetan estragu.
“Semana ida resin besik semana rua ona, ami-nia zeleira laran mós sasán sira estraga hotu. Ami-nia sosis ho ayam buras, ayam potong, agora ami soe de’it, ular barak ona ne’e, depois ami-nia telefone mate hotu,” nia hateten.
Tuir dadus postu administrativu Lolotoe iha aldeia 20, suku hitu ho totál populasaun 7,695, kompostu hosi mane 3,813, feto 3,882 no xefe família 1,592.
Enkuantu tuir obervasaun Jornalista Agência Tatoli iha terrenu notak katak, ekipa tékniku sira halo hela servisu iha terrenu hodi identifika poste hirak-ne’ebe kauza avaria iha área Oepho, suku Tapo.
Notísia relevante: EDTL Bobonaro garante eletrisidade lakan 24 oras iha loron eleisaun
Jornalista: Sérgio da Cruz
Editór: Evaristo Soares Martins
