BOBONARO, 17 janeiru 2024 (TATOLI)-Eletrisidade Timor-Leste, Empreza Públika (EDTL,EP) munisípiu Bobonaro, lideradu Koordenadór Mario de Jesus, ho ekipa Task Force sira kontinua halo esforsu ho tékniku oinoin hodi rezolve problema enerjia elétrika mate-lakan ne’ebé kauze hosi dezastre naturál udan no anin-boot durante ne’e.
Jerente EDTL, EP munisípiu Bobonaro, Mário de Jesus, informa, durante ne’e fatin hirak-ne’ebé sempre akontese ahi mate-lakan no avaria iha parte Fider (1) ne’ebé halo distribuisaun ba postu administrativu Bobonaro no Lolotoe inklui suku balun iha postu administrativu Atsabe, munisípiu Ermera.
Jerente empreza estatál ne’e informa, ne’e akontese poste haat monu iha postu administrativu Bobonaro no fiu média tensaun balu monu iha área postu admininistrativu Lolotoe inklui postu ida iha parte Fider (3) ne’ebé kobre hosi kapitál Maliana ba Balibo.
Notísia relevante: Tékniku EDTL, E.P rezolve eltrisidade mate-lakan iha Bobonaro no Lolotoe
“Ami rezolve iha loron ida nia laran, ahi agora normaliza, ami sempre asegura ahi, buat ida natureza ita lahatene, maibé ami sempre atende 24 oras, bainhira iha avaria ruma ne’ebe kauza hosi udan ho anin. Ida-ne’e ami iha reponsabilidade boot atu halo servisu tuir ami-nia forsa no tékniku ne’ebé iha,” nia imforma ba Tatoli iha Maliana, kuarta ne’e.
Tuir nia, maske situasaun klima ne’ebé ladún di’ak, maibé ekipa tékniku sira kontinua buka solusaun atubele garante distribuisaun enerjia elétrika lakan durante oras 24 nia laran.
Nia husu komunidade sira atu pasiénsia, tanba EDTL laiha kbiit atu satán natureza, bainhira akontese udan no anin-boot.
“Favór kompriende, tanba bainbain ami deteta avaria ho sistema manuál, la’o hosi ai-rin ida ba ida, ne’ebé presiza tempu, maibé bami pronta nafatin atu rezolve hodi fó naroman ba kliente hotu-hotu,” nia katak.
Tuir dadus, daudaun ne’e funsionáriu EDTL, EP Munisípiu Bobonaro hamutuk 35, hos totál ne’e koloka iha edifísiu, postu administrativu no sub estasaun na’in hitu.
Notísia relevante: EDTL, E.P identifika liña ditribuisaun tolu kauza ahi-mate lakan iha Bobonaro-Lolotoe
Jornalista: Sérgio da Cruz
Editór: Evaristo Soares Martins
