BOBONARO,21 Janeiru 2023 (TATOLI)—Eletrisidade Timor-Leste, Empreza Públika (EDTL,E.P) Bobonaro identifika ona liña distribuisaun iha fatin tolu ne’ebé avaria hodi fó kauza ba ahi mate-lakan iha postu administrativu Bobonaro no Loloto’e durante ne’e.
Notísia Relevante: EDTL Bobonaro esforsu fornsese eletrisidade ba komunidade Balibo-Atabae
“Fatin tolu mak ami identifika ona. Primeiru, mak iha Oe-Eleu dirasaun ba Tapo, fatin ida tan iha Alto-Lebos ne’e mós risku no ida iha Maulolok tun ba ne’e, mak sai kauza ahi mate-lana,” Supervizor EDTL, E.P Bobonaro, Mário de Jesus, informa ba jornalista sira iha kna’ar fatin, sábadu ne’e.
Liña hirak ne’e, nia dehna, tékniku sira dezeña ona no tuir planu iha fulan oin mai udan ho anin menus ne’es ei renova fila-fali, nune’e bele prevene anin labele baku poste no kabu media tensaun sira.
“Ami-nia hare eiha ne’ebá ninia kabu media tensaun la aat maibé nia izolatór bee aat ne’e mak la auguenta, tanba anin huu baku tun-sa’e to’o rabenta,” nia dehan.
Nia rekoñese, hahú hosi dezembru 2022 to’o janeiru 2023 ne’e enerjia eletrisidade mate kauze semana ida iha postu administrativu Babononaro no Lolotoe-Bobonaro inklui postu administrativu Atsabe, munisípiu Ermera.
“Ninia kauza ne’e hosi natureza mak hanesan udan no anin ne’ebé la fó fatin ba tékniku sira halo nia kna’ar. Maibé ami haree udan ho anin ne’e para uitoan ,ha’u ho ha’u-nia koordenadór ho ekipa toba iha terrenu kalan haat konsege rezolve ahi ne’e lakan to’o agora,” nia hateten.
Tanba ne’e. nia apela ba kliente EDTL, E.P iha munisípiu Bobonaro balun ne’ebé ahi mate-lakan, atu hein ho pasiénsia uitoan tanba natureza seidauk fó biban ba tékniku sira atu normaliza sistema no liña sira-ne’ebé hetan estragu hosi dezastre naturál.
Tuir dadus monografia hosi autoridade munisípiu Bobonaro katak iha tinan 2022 ne’e munisípiu Bobonaro iha aldeia 193, suku 50, postu administrativu neen (6) ho nia totál populasaun hamutuk 106,543 ne’ebé kompostu hosi mane 53,579 no feto 52,964 ho nia totál uma kain hamutuk 20,802.
Notísia Relevante: Tékniku EDTL, E.P rezolve eltrisidade mate-lakan iha Bobonaro no Lolotoe
Jornalista : Sérgio da Cruz
Editór : Cancio Ximenes
