Tékniku EDTL, E.P rezolve eltrisidade mate-lakan iha Bobonaro no Lolotoe
BOBONARO, 31 dezembru 2022 (TATOLI)—Tékniku unidade Eletrisidade Timor-Leste, Empreza Públika (EDTL, E.P) tun ona ba terrenu hodi rezolve eletrisidade mate-lakan iha postu administrativu Bobonaro no Lolotoe ne’ebé kauza hosi dezastre naturáal hanesaan udan no anin.
Koordenadór EDTL, E.P munisípiu Bobonaro, Mário de Jesus, esplika ahi mate-lakan durante ne’e tanba ai-riin eletrisidade barak mak monu tanba udan no anin.
“Agora daudaun ami rezolve ona, postu Bobonaro lakan ona, ahi lakan iha Maliana Fider 3 to’o Oe-Leu, orsida la kle’ur tan oras ida rua, postu Bobonaro ba to’o Atsabe-Ermera ahi bele lakan normál ona. Maibé Lolotoe seidauk bele lakan, ami agora iha Oe-leu sei observa ai-riin ieletrisidade ida-idak ba to’o Lolotoe,” nia imforma ba Agência Tatoli iha Oe-leu, sábadu ne’e.
Nia dehan, postu administrativu Lolotoe seidauk bele lakan tanba anin-boot difikulta Tékniku EDTL, E.P sira atu halo normalizasaun.
Difikuldade seluk mak Tékniku EDTL, E.P sira deteta avaria sira ne’e uza sistema manuál check ai-riin ida ba ai-riin ida seluk.
“Ami obriga ami-nia an tenke atua nafatin. Ne’ebé, ha’u husu Populasaun Lolotoe pasiénsia uitoan tanba udan ho anin mak la fó biban ba ami atu normaliza. Nune’e, ita hein volume anin menus ona mak ita resolve, nune’e ahi bele lakan normál fila-fali,” nia dehan.
Tanba ne’e, nia apela ba komunidade iha postu administrativu Bobonaro no Lolotoe atu kuidadu sasán eletróníka sira, nune’e labele aat bainhira akontese eletrisidade lakan fila-fali.
“Husu mós ba Kliente sira, bainhira detakta fatin eletrisidade avaria karik fó hatene Tékniku EDTL, E.P sira destaka iha postu sira, nune’e ami bele ba resolve tanba ami prontu servisu 24 oras, nune’e ahi bele lakan fali,” nia hateten.
Tuir dadus estatístika autoridade munisípiu Bobonaru 2022, postu Bobonaru iha aldeia 63, suku 18 ho totál populasaun 32,581 ne’ebé kompostu hosi mane 17,939, feto 14,661 ho nia totál xefe família 6.936.
Jornalista : Sérgio da Cruz
Editór : Cansio Ximenes
