OÉ-CUSSE 08 marsu 2023 (TATOLI) – Asosiasaun Feto Mudansa Ekonomia Família (AFMEF), selebra akordu ho grupu feto 35 hodi oferese fundu rotativa hamutuk rihun $83 atu dezenvolve inisiativa feto sira-nia kreatividade iha Rejiaun Administrativa Espesiál Oé-Cusse Ambeno (RAEOA).
Programa ne’e hetan apoia másimu hosi Autoridade RAEOA, liuhosi Gabinete Prezidente Autoridade ba Servisu Promosaun Igualdade no Inkluzaun Sosiál, ho objetivu atu fasilita no empodera ekonomia feto, hodi promove talentu inisiativa inan-feto sira atu dezenvolve talentu feto nian iha setór oinoin, atu hasa’e kapasidade ekonomia família, nune’e kontribui finanseiru hodi kombate violénsia doméstika.
Iha biban ne’e, Prezidente Autoridade RAEOA, Arsénio Paixão Bano, hato’o parabéns, tanba hahú ho fundu rihun $94 oferese ba grupu 34, hodi uza hala’o atividade bazea inisiativa kada grupu, maibé hafoin tinan rua de’it, grupu sira konsege rekolla ona nia funan rihun $83, hodi oferese fali ba grupu seluk atu kontinua hala’o hanesan fundu rotativa.
“Ami kontente tebes ne’e hatudu susesu ida iha programa empoderamentu nian, tanba iha tinan rua liubá Autoridade deside serbisu hamutuk ho AFMEF, RAEOA apoia 34 grupu ho nia orsamentu rihun $94, osan ne’e halo rotasaun ba grupu feto sira iha Oé-Cusse, ho intensaun depois tinan rua osan ne’e tama fali, nia funan bele uza ba grupu no uza mós ba nesesidade família idak-idak,” Arsénio Paixão Bano ko’alia iha Otél Ambeno, Oé-Cusse, segunda ne’e.
Ezekutivu ne’e enkoraja nafatin grupu feto sira atu konstinua serbisu hamutuk mellora prestasaun iha inisiativa sira, hodi kontribui ba dezenvolvimentu ekonomia família iha rejiaun ne’e.
“Ha’u kontente tebes, tanba iha rezultadu di’ak, grupu 34 liubá agora aumenta grupu ida tán ba grupu 35, osan ne’ebé maka sirkula iha grupu sira agora rihun $83, ne’e nia funan nia fundu nafatin $94, tinan rua de’it osan ne’e bele fila, ha’u husu kontinua mellora imi-nia prestasaun atu hadi’a ekonómia iha ita-nia rejiaun ne’e rasik,” nia fó hanoin.
Diretóra AFMEF, Joana Bobo Tanu, agradese ba Autoridade RAEOA bele apoiu fundu atu tulun grupu sira iha rejiaun ne’e.
“Ami asosiasaun AFMEF kontente tebes, tanba ami mós la’o ho voluntariamente durante tinan ida, maibé osan ne’e konsege ami hetan hotu ba tau fali iha banku BNCTL,” nia orgullu.
Dirijente Feto Mudansa Ekonomia Família ne’e fó-sai katak, atividade ne’ebé grupu sira hala’o bazea pedidu kada grupu liuliu bazea rendimentu ne’ebé fasil bele hetan osan, hanesan reimbolsa, atividade negósiu seluk tán.
“Iha tinan rua liubá, ekipa AFMEF akompaña no avalia grupu 34 sira susesu, tanba maske la hola buat barak, maibé bele hola netik karau, no hadi’a uma rasik, ne’e signifika katak iha mudansa, tan ne’e maka ami agradese ba Autoridade tanba só Oé-Cusse de’it mak bele tulun inan feto sira-nia inisiativa atu hadi’a ekonómia família,” nia agradese.
Entretantu, grupu feto 35 ne’e mai hosi reprezenta suku 18 iha sub-rejiaun haat, Oésilo, Pássabe, Nítibe no Oésilo, kada grupu envolve ema na’in-10 iha diretu simu fundu ne’e hamutuk $2,200, ho durasaun kontratu durante tinan ida, hahú 08 marsu 2023 to’o 08 marsu 2024.
Fonte finansiamentu ba programa empoderamentu ekonomia ne’e mai hosi fundu subvensaun ka fundu transferénsia públiku hosi RAEOA, ne’ebé autoridade aloka hamutuk rihun $94 hanesan fundu rotativa ba grupu feto potensiál sira iha Oé-Cusse Ambeno.
Notísia relevante: AFMEF husu Governu solusiona tais ne’ebé la konsege aprezenta ba Expo Dubai
Jornalista: Abílio Elo Nini
Editór: Evaristo Soares Martins
