OEKUSI, 08 Juñu 2026 (TATOLI) – Prezidente Kamára Komérsiu Indústria Timor-Leste (CCI-TL), Jorge Manuel de Aroújo Serano, hamutuk ho Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, segunda ohin fó tomada pose ba estrutura CCI-TL Oekusi na’in-16 ho mandatu tinan rua, husi 2026 to’o 2027.
Iha diskursu, Prezidente CCI-TL, Jorge Manuel de Araújo Serano, enkoraja estrutura foun CCI-TL Oekusi katak presiza akumula ideia husi setór privadu sira hotu hodi hamutuk ho Governu atu dezenvolve ekonomia iha Rejiaun Espesiál Oekusi Ambeno, tanba Oekusi iha ona mudansa investimentu infraestrutura, nune’e presiza serbisu hamutuk, dezenvolve ekonomia ho di’ak atu fó moris ba povu Oekusi.
“Orgullu ho emposadu sira hakarak simu responsabilidade ne’e, imi ekipa forte no iha vontade atu kontribui, maibé hanesan CCI-TL, ha’u-nia preokupasaun, RAEOA hanesan enklave ida tenke moris ho ninia rekursu rasik atu-bele iha sustentabilidade, la’ós mai husi OJE maibé ekonomia rai laran mak setór privadu tenke dezenvolve ekonomia iha rejiaun ne’e,” nia hateten perante seremónia pose, hala’o iha salaun konvensaun Palaban, ohin.
Notísia relevante:Governu husu CCI-TL forma vizaun ida ho Governu dezenvolve ekonómia interna
Nia informa, deklarasaun sira husi Primeiru-Ministru (PM) nia mensajén sira, katak dudu setór privadu ne’e bele ativu liu atu fó moris ba nasaun ho Estadu, ida-ne’e responsabilidade ema hotu nian, polítika sira halo polítika ho regulamentu sira, maibé setór privado sira maka tenke book aan.
“Ita ukun-an tinan-24 ona, idade joven ona, no hatene oinsá hakat ho desizaun no responsabilidade sira, ha’u hanoin Oekusi, hanesan rejiaun espesiál administrativa, laiha difikuldade barak iha ekonomia, maibé oinsa Oekusi bele moris, ita haree infraestrutura sira iha mudansa ona kompara ho uluk, maibé ekonomia ha’u hanoin presiza ko’alia barak, maibé ha’u fiar Autoridade RAEOA sei kria kooperasaun di’ak ho CCI-TL bele hamutuk lori mudansa ba ekonomia iha Oekusi,” nia hateten.
Notísia relevante:“Akumula ema hotu promove ekonomia Oekusi” – Esperansa setór privadu ba PME
Iha biban ne’e, Prezidente emposadu CCI-TL Oekusi, Frederico Texeira, kompromete katak, sei simu responsabilidade maibé hanesan motivasaun atu akumula setór privadu sira hodi sai ponte ba investimentu ekonomia iha Oekusi.
“Konfiansa ida-ne’e, la’ós responsabilidade ba ha’u, maibé ida-ne’e mós motivasaun bo’ot atu serbisu maka’as liutan, ha’u fiar katak ho espiritu hamutuk ita sei hametin liu tan CCI-TL Oekusi, hodi sai lian ponte ba emprezáriu lokál ho investimentu no sai ajente hodi loke empregu ba joven sira iha Oekusi, ha’u prontu atu aprende no rona atu serbisu maka’as iha lideransa hanesan Prezidente, sei la serbisu ba ema ida, maibé sei serbisu ba futuru ekonomia Oekusi nian,” nia promete.
Prezidente Autoridade RAEOA, R’egio da Cruz Salu, hateten, Autoridade hahú ona halo promosaun liuhusi programa Movimentu Emprendedorizmu, tanba ne’e sei serbisu hamutuk ho CCI-TL atu define área prioritóriu sira hodi dezenvolve ekonomia Oekusi.
“Reprezenta kompromisu Governu atu fundamentu papél CCI-TL nian iha Oekusi, hanesan mós preparasaun ba Orsamentu Jerál Estadu liliu ba tinan oin, rasionalizadu ba orientasaun ekonomia, ne’ebé ha’u fó parabéns ba membru CCI-TL, ohin simu ona pose ne’e hanesan serbisu todan ba ita hotu, tanba ita tenke fó razaun ho justifikasaun ba ita-nia líder sira no Estadu katak, ita hamutuk iha parséria ida-ne’e, atu lori vizaun ne’e tenke iha prátika,” iha hateten iha salaun konvensaun Palaban Oekusi, ohin.
Notísia relevante:CCI-TL halo validasaun interna ba peskiza kona-ba tranzisaun justu ba negósiu verde
Jornalista: Abílio Elo Nini
Editór: Rafael Ximenes de A. Belo
