BAUCAU, 10 marsu 2023 (TATOLI)– Tuir planu iha fulan marsu ne’e, Programa Nasionál Dezenvolvementu Suku (PNDS) reabilita sede suku Fatulia, postu admistrativu Venilale, munisipiu Baucau. Xefe suku Fatulia, Angelino Moisés Perreira, hateten programa refere iha ona faze kontratu ba badaen no koutasaun ba kompaña fornesedór materiál fabrikanu no materiál lokal sei responsabiliza hosi ekipa jestaun suku.
“Kuandu reabilita ona bele fasilita ba autoridade suku atu halo atendimentu publiku, kondisaun di’ak bele ona halo atendimentu ho efisiensia no efikasia,” Xefi suku Fatulia hateten iha Vila nova, sesta ne’e.
Tipu ne’ebé sei reabilita mak hanesan áreador sede suku, kakuluk, plafon, keramik, janela no odamatan ne’ebé tuir planu hafoin remata kontratu ho durasaun fulan-tolu.
Tótal orsamentu ba programa RSS iha suku Fatulia hamutuk rihun $12 ne’ebé tuir estimasaun tekniku hosi ekipa PNDS, maske parte autoridade sente orsamentu ne’ebé aloka ba projetu refere seidauk sufisiente hodi kobre hotu tipu seluk iha sede suku refere.
Suku Fatulia hamutuk aldeia haat kompostu aldeia Bahadato, Osso-uaque, Uai-to-bono no Uatulia-ana ho tótal populasaun hamutuk rihun 2.721 hosi uma-kain 688.
Jornalista : Natalino Belo
Editór : Florencio Miranda Ximenes
