DILI, 04 maiu 2023 (TATOLI) – Fundu Dezenvolvimentu Kapitál Umanu (FDCH, sigla portugés) sei atribui bolsa méritu ba estudante na’in-18 ne’ebé hetan oportunidade atu kontinua sira-nia estudu iha Brazíl no Portugál iha tinan ida ne’e.
Diretór-Ezekutivu FDCH, Cristovão dos Reis, informa katak iha ona lista estudante selesionadu bolsa méritu ne’ebé maka oras ne’e prepara hela atu tuir prova orál hodi kontinua estudu iha nasaun rua refere.
Nia salienta estudante ne’ebé hetan oportunidade iha tinan ne’e kompostu husi lisensiatura na’in-14 no mestradu rua. Aléinde ne’e, FDCH oferese mós bolsa ba dosente 16 husi universidade privada ne’ebé hetan ona akreditasaun atu kontinua estuda iha país rua ne’e.
Tuir nia, estudante bolsa méritu 18 no dosente 16 ne’e sei sai hosi Timor-Leste iha tinan ne’e katak bá Brazil entre outubru no dezembru no Portugál entre agostu no setembru, tanba sira-nia aula sei hahú iha 2024.
Reponsavel ne’e esplika tempu estudu ba nivel lisensiatura no mestradu iha nasaun rua ne’e la hanesan, maibé tuir kontratu ne’ebé mak hatuur ona iha rekizitu ka regra sira FDCH nian, kuandu estudante ida la konsege remata ninia estudu tuir tempu ne’ebé determina, tenke devolve osan ne’ebé hasai hodi apoiu sira ne’e ba kofre Estadu.
“Iha mós posibilidade seluk ne’ebé FDCH bele konsidera maka bainhira sira-nia durasaun tempu liu ona, maibé valór no komportamentu iha estudu atinje ona 75%, bele aprezenta justifikasaun hosi universidade ne’ebé sira eskola ba atu fó biban ba FDCH hodi bele analiza atu foti desizaun hodi estende sira-nia bolsa. Bainhira ida ne’e maka laiha, ita sei la konsidera”, Cristovão dos Reis hatete ba Tatoli, kinta ne’e.
FDCH hatuur ona iha regra katak valór ba lisensiatura, liuliu kursu siénsia sosiál tenke atinje 3,0 no ba ezata 2,5 ka médiu entre 14 ou 15. “Se ida ne’e maka sira la atinje, tenke devolve fosan sira ne’e ba kofre Estadu”, nia reitera.
Orsamentu ne’ebé FDCH prevee ona ba tinan ida ne’e hodi apoia fundu ba estudante sira ne’ebé hakarak kontinua sira-nia estudu iha rai-laran no mós li’ur hamutuk millaun $11. Verba sira ne’e maka prepara hodi apoiu ba bolsa parsiál, hakbiit no pur méritu.
Ba bolseiru 34 ne’ebé atu bá Brazíl no Portugál ne’e, FDCH sei la separa orsamentu ba sira tanba lakohi foti risku ho razaun kustu vida iha nasaun rua diferente, propina ba kursu iha universidade mós la hanesan, maibé tau hamutuk ho fundu millaun $11 atubele aseguraa sira-nia nesesidade iha nasaun rua ne’e.
Jornalista: Tomé Amado
Editora: Maria Auxiliadora
