MALIANA, 08 maiu 2023 (TATOLI)-Diretór Komisaun Nasionál Eleisaun (CNE, sigla portugués) munisípiu Bobonaro, Juvito Ramos, observa kampaña eleitorál iha munisípiu Bobonaro, líder polítiku sira evita ona liafuan insulta no difama malu iha palku leten.
Notísia relevante: CNE Bobonaro husu afiliante sira ‘labele insulta partidu anteriór’
“Ein-jerál ita haree durante kampaña eleitorál iha munisípiu Bobonaro laio ho di’ak tanba líder partidu polítiku sira laiha ona liafuan insulta malu no difama malu, tuir ami-nia observaasaun sira hato’o de’it programa ba militante sira,” nia imlnforma ba Jornalista sira, iha Maliana, segunda ne’e.
Nia husu líder polítiku sira atu mantein disiplina no kumpre regra ne’ebé regula kona-bá kampaña eleitorál nune’e bele hatudu ezemplu di’ak ba militante no simpatizante sira.
Diretór Juvito mós dehan, ofisiál supervizaun eleitorál sira identifika katak funsionáriu públiku sira utiliza patrimóniu estadu partisipia direita iha kampaña eleitorál.
Maibé responsável CNE munisípiu Bobonaro ne’e la esplika detallu funsionáriu refere hosi instituisaun ne’ebé no partidu polítiku ne’ebé nian.
“Sira uza motorizada governu nian partisipa kampaña, motorizada sira-ne’e ami prende (halo apreensaun, lori ona ba kantor polísia hodi prosesa iha Ministériu Públiku, tuir ami-nia supervizaun funsionáriu públiku sira balu mós partisipa iha kampaña eleitorál iha oras serbisu,” Juvito relata.
Tuir oráriu hosi CNE katak, loron-tersa (09/05) ne’e Partidu Os Verdes de Timor (PVT) ho númeru sorteiu (6) sei hala’o kampaña ho tipu diálogu iha kampu Futsál Postu administrativu Balibo no postu administrativu Lolotoe, hahú tuku 08:00 to’o 18:30.
Alende ne’e Partidu Repúblikanu (PR) sei hala’o kampaña ho tipu diálogu iha suku Coelima, postu administrativu Atabae, hahú tuku 09:00 to’o 12:00.
Notísia relevante: CNE Bobonaro identifika ona fatin kampaña eleitorál
Jornalista: Sérgio da Cruz
Editór: Evaristo Soares Martins
