VIKEKE, 06 Maiu 2026 (TATOLI)—Koordenadór Sentru Agro-Komérsiu Indútria Raitahu, Suku Uma-Ua’in Kraik, Postu Vikeke Vila, Munisípiu Vikeke, Augusto Pinto Soares, informa programa pekuária ne’ebé implementa iha Sentru Agro-Komérsiu Indústria Raitahu daudaun ne’e enfrenta difikuldade ba kombustivel ba tratór boot no karreta tula hahán karau nian.
“Dezafiu ne’ebé daudaun ami enfrenta mak kombustivel ba tula hahán bá karau luhan nian tanba akontese presu kombustivel sa’e,” Augusto Pinto Soares ba Tatoli,I.P iha sentru Raitahu, ohin.
Koordenadór ne’e dehan dezafiu ne’e sentru aprezenta ona ba nasionál atu rezolve nune’e garante operasaun atividade referida.
Nia aprezenta katak progresu implementasaun programa karau susu-been hahú husi fulan-Janeiru 2026 konsege hois ona susu-been karau hamutuk mili-litru 4.200 ne’ebé daudaun ne’e sei rai hela iha armazein Sentru Raitahu hodi hein prosesu teste laboratóriu hafoin fornese ba eskola sira.
“Ami kontinua hois karau-inan rua. Husi inisiu karau timur hamutuk 11. Foin lalais karau-inan rua hahoris tan ne’ebé agora karau hamutuk 13. Enkuantu, karau vaka hamutuk 11,” nia haktuir.
Kona-ba bibi, nia esplika, daudaun ne’e bibi hamutuk hitu (7), inan haat (4) no bibi aman tolu (3). Bibi sira-ne’e sei prodús susu-been, maibé hein hahoris hafoin bele hois.
Aleinde ne’e, Augusto informa, Sentru Raitahu kuda mós hahán balada nian iha ektare sia (9), lamtoro ektare tolu, batar kayrala metade ektare, king grass ektare haat (4).
“Ha’u sente progresu ba pekuária iha Sentru Raitahu la’o di’ak tanba númeru karau komesa aumenta ba beibeik. Bá-oin, munisípiu no nasionál servisu hamutuk Sentru Agro-Komérsiu Raitahu sei fó rezultadu pozitivu,” nia tenik.
Fasilidade sira iha sentru agro-komérsiu kompostu husi fasilidade hois karau susu-been, tratór boot ida, tratór ki’ik unidade tolu (3), frizer, jeradór, karreta rua, motorizada roda tolu ida, makína harahun duut no ekipamentu sira seluk.
Daudaun ne’e, funsionáriu hamutuk na’in-16 kompostu husi mane na’in-13 no feto na’in-tolu (3) ne’ebé servisu ativu iha Sentru Agro-Komérsiu Raitahu hodi tau-matan ba atividade pekúaria no atividade sira seluk.
Jornalista: Vitorino Lopes da Costa
Editór: Xisto Freitas da Piedade
