Top

Administradór Bazartete lori prosesu administrasaun to’o iha suku-atende komunidade ho lais

Administradór Postu Administrativu Bazartete, João Nascimento Braz. Imajen/Espesiál.

DILI, 16 Novembru 2026 (TATOLI)—Administradór Postu Administrativu Bazartete, João Nascimento Braz, informa durante ninia mandatu tinan ida iha Bazartete, nia foku liu ba lori prosesu administrasaun to’o iha suku, hodi nune’e suku sira bele halo atendimentu ne’ebé lais liu ba komunidade.

“Ha’u-nia mandatu foin tinan ida iha Bazartete, buat ne’ebé ha’u halo ne’e mak lori prosesu administrasaun ba to’o iha suku. Signifika katak suku sira tenke halo atendimentu ida-ne’ebé lais liu ba komunidade,” Administradór ne’e hateten ba TATOLI via telefone, ohin.

Nia hatutan, progresu ne’ebé iha mak aprova projetu sira ba dezenvolvimentu liuliu estrada no bee-moos liuhusi Programa Nasionál Dezenvolvimentu Suku (PNDS).

“Progresu ne’ebé iha mak ita aprova projetu sira ba dezenvolvimentu liuliu estrada no bee-moos liuhusi Programa Nasionál Dezenvolvimentu Suku (PNDS). Programa hotu aprova liuhusi asembleia Postu Administrativu, membru sira hotu mak aprova hafoin implementa,” nia esplika.

Tuir Administradór, suku sia (9) iha Bazartete, PNDS kuaze la’o di’ak hotu mak hanesan reabilita ka normaliza estrada, bee-moos no refetóriu.

“Programa sira-ne’e ita implementa iha suku haat (4) hanesan Leorema, Fahilebu, Ulmera no Maumeta ne’e kona mós iha refeitóriu nian. Estrada kona iha Suku Leorema, Metagou, Fatumasi, Maumeta no Lauhata, sira-ne’e iha tinan ne’e kona estrada ho nia progresu sira di’ak no susesu tebes,” nia dehan.

Aleinde ne’e, PNDS mós kona hadi’a eskola iha suku sira Fahilebu no Ulmera nr’r, hadi’a Eskola tinan ida-ne’e Suku Tibar halo iha Hunbuti, no agora prosesu la’o hela,” nia hateten.

Tuir dadus públiku husi Portál Autoridade Munisipál Likisá, totál alokasaun orsamentu PNDS 2026 ba Munisípiu Likisá tomak mak $1.169.264,00, inklui Postu Administrativu Bazartete.

Totál ne’e aloka liuhusi kategoria Transferénsia Públika ba suku 23 iha munisípiu laran.

To’o iha 14 Outubru 2026, ezekusaun orsamentu atinje ona $1.099.363,97 ka besik 94%, ho saldo balansu restu hamutuk $69.900,03.

Postu Administrativu Bazartete kompostu husi suku sia (9) no aldeia 45. Iha siklu jerál PNDS, kada suku baibain simu subsídiu diretu ho valór entre $40.000 to’o $70.000 atu finansia infraestrutura bázika hanesan bee-moos, dalan, no fasilidade komunitária, tuir prioridade no númeru populasaun suku ida-idak nian.

Jornalista : Hortêncio Sanchez

Editór        : Cancio Ximenes

Publisidade

Leave a Reply

Latest Post

error: Content is protected !!