MANATUTO, 08 maiu 2023 (TATOLI)—Diretór Servisu Edukasaun Munisípiu Manatuto, Graciano de Jesus Baptista, orienta ona Ekipa Jestór Programa (EJP) merenda eskolár nian iha Manatuto atu sosa produtu lokál ne’ebé prodús hosi komunidade lokál.
“Tanba ami orienta ona Ekipa Jestór Programa Merenda Eskolar atu hakarak lakohi tenke sosa produtu lokál, ne’e signifika sira sosa mak komunidade lokál prodús ne’e. La’ós ba sosa iha fatin seluk. Purezemplu, iha Laclubar mezmu sosa produtu lokál duni maibé ba sosa produtu ne’ebé prodús hosi Betano, Same, Viqueque,” nia hateten ba Agência Tatoli, iha nia kna’ar fatin Manatuto, foin lalais ne’e.
Nia hatutan, produtu agrikultura ne’ebé sosa iha fatin seluk ne’e bele maibé tenke hosi komunidade ka grupu produsaun aihan Manatuto nian.
“Mezmu sosa produtu lokál maibé osan ne’e sai. Ita-nia hakarak ne’e, sosa
produtu lokál maibé tenke komunidade lokál nian, nune’e osan ne’e sirkula de’it iha komunidade ne’e, labele sai ba fatin seluk,” nia dehan.
Sira-nia parte halo ona koordenasaun ho dirasaun seguransa alimentár no agrikultura Manatuto nian hodi prepara grupu ba produsaun produtu lokál.
“Apartir ami halo relasaun di’ak ho dirasaun sira-ne’e, tanba ami hosi Servisu Edukasaun Munisipál prepara ona osan, parte agrikultura tenke halo sensibilizasaun no kapasita komunidade ka grupu balun atu oinsá bele prodús produtu lokál,” nia hateten.
Tanba, tuir orientasaun Ministériu Saúde ne’ebé bandu aihan importadu hanesan sosis, biskuit masin, susu-been lata no temperus hanesan masako, ajinamoto no implementasaun merenda eskolar ne’e 75% maihosi produtu lokál.
“Atu implementa produtu lokál 75% mak ami servisu hamutuk ho Servisu Seguransa alimentár ho agrikultura, nune’e parte dirasaun ida-idak nian oriente ninia komunidade atu prodús aihan lokál sira. Ida-ne’e, ami koordena ona maibé inundasaun 04 abríl liubá halo entaun estraga tiha. Hanesan iha Postu administrativu Laclo, komunidade haki’ak tiha ikan maibé udan mota estraga tiha no iha balun ne’ebé kuda modo maibé estraga hotu,” nia dehan.
Iha tinan ne’e, nia dehan, Servisu Edukasaun Munisipál hahú implementa programa merenda eskolár iha loron 02 maiu 2023, no orsamentu ne’ebé aloka ne’e iha $863.308,82 maibé hamutuk ho konstrusaun pre-eskolár nian mak millaun $1.420.
Jornalista : Osória Marques
Editór : Cancio Ximenes
