DILI, 20 Maiu 2026 (TATOLI)–Tenente Jenerál Reformadu, Lere Anan Timur nu’udár veteranu apela ba joven sira atu kontinua kaer kuda-talin no bali didi’ak nasaun no povu ida-ne’e iha futuru.
“Ohin, ita komemora ita-nia Restaurasaun Independénsia RDTL ba da-XXIV (20 Maiu 2002-20 Maiu 2026), más antes komemora ita-nia Restaurasaun Independénsia, FRETELIN Proklama ona ita-nia independénsia unilaterál iha 28 Novembru 1975. Komunidade internasionál no ONU biar la rekoñese maibé ita-nia lideransa ne’ebé sira ohin loron sei moris, sira-ne’ebé harii nasaun ida-ne’e sei moris, hanesan José Ramos-Horta, Marí Alkatiri, Abílio Araújo, Roque Rodrigues no sira seluk ne’ebé ohin loron sei moris, sira ho aten-brani iha 28 Novembru Proklama ita-nia independénsia unilaterál. Tanba ne’e ha’u apela ba joven atu prepara an, sai matenek, aban-bainrua sai líder ba nasaun ida-ne’e, kuda-talin Timor-Leste ami entrega ba imi-nia liman, bali didi’ak ita-nia nasaun no povu ida-ne’e,” Lere Anan Timur dehan ba jornalista sira iha nia Rezidénsia, Faról, Tersa (19/05/2026).
Nia hatutan molok restaura independénsia totál no kompleta, tinan rua Organizasaun Nasaun Unida (ONU) administra tranzitória.
“Ha’u bele dehan katak Timor diferente duni, tanba ONU interven iha nasaun barak ne’ebé iha konflitu lori tempu no fakar raan maka foin hetan independénsia, dalaruma ohin loron balun seidauk, dalaruma ONU laiha susesu ba sira nia intervensaun iha nasaun sira-ne’ebé konflitu, más Timor tinan rua de’it. Sira esforsa duni maibé ita-nia povu maka determina ninia auto determinasaun. Entaun, ida-ne’e maka dala ida tan ha’u fó parabéns no parabéns ba ita nia líder sira-ne’ebé harii nasaun ida-ne’e,” nia esplika.
Nia hatutan líder sira-ne’ebé harii nasaun ida-ne’e ohin loron tama hotu ona ba idade 70 no tama ona tinan 80, sei labele moris to’o tinan 100.
“Ha’u hanoin katak ita-nia líder sira balun laiha ona, balun sei iha karik, ha’u hanoin katak sira laiha ona Governu, la kaer ona knaar nu’udár ukun-na’in, maibé ita labele haluha katak sira maka harii nasaun ida-ne’e, tan ne’e sira líder nasionál nafatin. Ha’u hanoin katak 20 Maiu ida-ne’e, reflesaun ba sira, reflesaun bazeia ba ita-nia kontribuisaun matenek, ita-nia servisu ne’ebé ita harii nasaun ida-ne’e. Tanba ita-nia independénsia la’ós fin, tanba sira sei moris. Ita ohin loron Timor-Leste nia juventude intelektuál barak maka matenek, sira-ne’e maka sei kaer destinu nasaun nian, sá mensajen maka ita fó ba sira atubele sama tuir ita-nia ain-fatin, atu kaer kuda-talin rasik,” Lere haktuir.
Biban ne’e, nu’udár veteranu nia hakarak apela ba estudante no juventude ne’ebé konklui ona estudu, futuru Timor-Leste iha sira-nia liman, tanba ne’e saida mak sira tenke halo ba rai ida-ne’e depoiz inan-aman luta ba rai ida-ne’e la eziste ona.
Jornalista: Osória Marques
Jornalista: Xisto Freitas da Piedade
