DILI, 31 maiu 2023 (TATOLI) – Komandante Jerál Polísia Nasionál nomea ofisiál no superiór na’in-neen hodi okupa iha estrutura Komandu Jerál PNTL.
Komandante Jerál PNTL Komisáriu Jerál Polísia Henrique da Costa liuhosi nia despaixu númeiru 209 /CG-PNTL/V/2023 nomeia no fó posse ba Superintendente Xefe Jorge Monteiro hodi asume kargu Komandante Departementu Inspesaun Jerál Komandu Jerál PNTL no asume mós kargu nudar Diretór Displiñar Justisa Interinu Komandu Jerál PNTL.
Komandante Jerál PNTL nomeia no fó posse ba Superintendente Ludgeiro Picancio Madeira Lay ba kargu Komandante PNTL Rejiaun Administrativa Espesiál Oecusse Ambeno (RAEOA) interinu hodi troka Komadante PNTL REOA sesante Superintendente Xefe Mateus Mendes Assunção ne’ebé tama ona ba reforma.
Henrique da Costa, nomeia no fó posse ba Superintendente Asistente Luis da Costa ba kargu Komandante PNTL Munisípiu Aileu interinu hodi troka Superintendente Ludgeiro Picancio Madeira Lay.
Komandante Jerál PNTL Komisáriu Jerál Polisia Henrique da Costa, nomeia no fó posse ba Superintendente Asistente Luis Soares Barreto hodi asume kargu Xefe Departementu Depertamentu Investigasaun Kriminál (DIK) Interinu troka Komandante Jorge Monteiro.
Nia mós nomeia no fó posse ba Inspetór Xefe Roberto Pereira dos Santo ba asume kargu Xefe Departementu Operasaun Interinu Komandu Jerál PNTL no nomeia no fó posse ba Inspetór Polísia, José Manuel Guterres Silva ba kargu Xefe Departementu Gabeinete Komuikasaun no Relasaun Públika Komandu Jerál PNTL.
Hafoin fó posse ba Ofisiál no Superiór na’in-neen, Komandante Jerál PNTL, Komisáriu Jerál Polísia Henrique da Costa hateten, rotasaun ba nomeasaun transferénsia, rekrutamentu no reforma, buat sira ne’e sempre akontese iha ha instituisaun estadu ka kompañia ka orgauniazaun ne’ebé de’it.
“Serimónia ida ohin ne’e, ita halao bazea ba kolega balun tama ba iha faze reforma ka faze aprezentasaun no automatikamente kargu ka estrutura Komandu sei mamuk, tanba ne’e, ohin ita halo tomada posse ba ita-nia superiór sira balun sub-alternu sira balun, atu priénse vaga ka estrutura ne’ebé maka mamuk”, Komisáriu Jerál Polísia Henrique da Costa hateten iha nia intervensaun iha Komandu Jerál PNTL, kuarta ne’e.
Iha biban ne’e, Komandante ne’e Jerál PNTL agradese ba ofisiál no superiór inklui Sub-Alternu sira ne’ebé antes ne’e priénse estrutura Komandu Jerál PNTL hodi asume kargu ho dedikasaun bo’ot to’o reforma.
“Ha’u hakarak uza momentu ida ne’e hakarak hato’o agradesimentu ba ofisiál superiór sira, ofisiál sub-alternu sira ne’ebé mak antes ne’e asume responsablidade, asume kargu hanesaan komandante iha supervizaun sira iha Komandu Jerál hanesan Komandu Administrasaun, Inspetór Jerál PNTL, Diretór Departementu Disiplina Justisa Komandu PNTL, mezmu ke ohin la marka prezensa iha ne’e, agradese ba ita bo’ot sira nia kontrbuisaun durante ita bo’ot sira asume responsablidade”, nia agradese.
Jornalista: Natalino Costa
Editór : Zezito Silva
