BAUKAU, 02 Novembru 2025 (TATOLI) — Padre Pároku Laga, Rui Gomes SDB, hateten iha loron finadu ne’e reza ba matebian sira-ne’ebé sei iha purgatóriu atubele moris rohan laek nian.
“Tradisonalmente ita lori ai-funan, lori lilin ba sunu igreja no ita vizita rate ka semitériu matebian sira-nian, ida-ne’e mak prátika komún ne’ebé ita iha, maibé igreja hanorin ita katak finadu ne’e ita reza maka’as ba matebian sira, liuliu sira-ne’ebé mak sei iha purgatóriu atubele alkansa moris rohan laek. Loron defuntu nian ne’e loron ne’ebé ita tenke reza maka’as ba ema sira-ne’ebé klamar sira iha purgatóriu,” Padre Rui Gomes, ko’alia Parókia Laga, domingu ne’e.
Nia esplika, vizita rate halo orasaun, sunu lilin ne’e buat-ne’ebé mak tradisaun igreja nian, agora rai hahan ba matebian sira nu’udar tradisaun kultura timor nian, tanba ne’e sempre dehan ligasaun ho timor nia tradisaun dehan katak han, matebian sira mós han, ida-ne’e bazikamente bele dehan katak la’ós igreja nia hanorin, maibé ida-ne’e ligasaun ho tradisaun kultura timor nian.
“Bainhira finadu ne’e ba han katupa, hemu ka família sira bolu malu halo festa oituan iha momentu ne’e, maibé bazikamente igreja hanorin mai ita katak momentu ne’e momentu orasaun nian, momentu reza no vizita, liuliu ita halo sakrifísiu ruma atu nune’e ita-nia matebian sira-ne’ebé mak seidauk hetan moris rohan laek iha purgatóriu bele hetan lalais salvasaun,” nia haktuir.
Nia esplika, loron finadu ne’e relasaun boot ema-nia fiar ida-ne’ebé mak uluk iha prugatóriu, tanba hotuhotu hatene katak loron finadu la’ós foin hahú maibé dezde prinsípiu igreja kristianizmu nian, entaun loron finadu ne’e hahú ona, ema reza ba matebian sira no buat-ne’e forte liután iha funu nia laran, ema barak mate no igreja determina atu reza mós ba sira-ne’ebé mak mate iha funu nia laran.
Padre Pároku Laga ne’e haklaken, sarani sira-ne’ebé fiar igreja mak barak liu no iha momentu ne’ebá, loron ida-ne’ebé bolu finadu, espesialmente ba monje sira ka sira-ne’ebé reza uluk ba ema mate sira-ne’e.
“Maibé iha igreja hanorin mai ita katak ita iha igreja ne’ebé bolu naran igreja militante ka ema sira-ne’ebé mak sei la’o iha mundu ne’e, depois igreja glorioza mak igeja ida-ne’ebé ema sira liu santu sira, ita fiar katak tama ona reinu lalehan nian, maibé ita mós hatene katak ema hotu mate la’ós perfeitamente,” nia esplika.
Padre Pároko Laga ne’e fó mensajen ba sarani katólika ne’ebé selebra finadu ne’e sei mate, tantu bele ba ema di’ak sira, ba liu lalehan maibé fiar katak sira-ne’e balun mate ho pekadu kiik sira, tanba ne’e mak mai reza ba malu katak ohin loron reza ba balun ne’ebé mate ona.
Notísia relevante : Selebrasaun finadu iha Laga la’o ho hakmatek
Jornalista : Felicidade Ximenes
Editór : Evaristo Soares Martins
