Abitante Abadere lamenta empreza dada fiu fó risku ba komunidade
VIKEKE, 05 Novembru 2025 (TATOLI)—Abitante husi Aldeia Abadere, Suku Babulu, Postu Administrativu Uatulari, Munisípiu Vikeke, Paulino Maria Guterres lamenta ho empreza responsavel ne’ebé dada fiu eletrisidade husi ai-leten mak bá komunidade nia uma.
“Empreza fó risku ba ami tanba sira dada fiu eletrisidade liuhusi ai-leten no lutu leten. Loloos ne’e sira dada iha poste eletrisidade leten. Ami ta’uk labarik ruma halo kanek fiu metan bele soke mate ema,” Paulino ba jornalista sira iha Abadere, Kuarta ne’e.
Paulino hatutan iha Bill of Quantities (BoQ) ne’e prevee poste eletrisidade hamutuk neen, maibé iha implementasaun la akontese.
“Ida-ne’e ami hato’o ona ba empreza, maibé sira fó resposta ba ami dehan haree lai mak tau poste. Tan ne’e mak to’o agora seidauk mai tau poste neen ne’ebé liga mai iha ami-nia uma,” nia hato’o.
Iha fatin hanesan, Xefe Aldeia Abadere, Rogério Mascarinhas haktuir empreza ne’ebé dada eletrisidada laiha responsabilidade tanba ai-riin to’o de’it iha Ossokiua, maibé dada mai área Abadere dada husi ai-leten fali.
“Ami ta’uk tebes fiu eletrisidade ne’ebé dada husi ai-leten no balun monu iha rai. Iha-ne’e labarik barak. Tan ne’e, ami husu ba ministériu kompetente atu tau-atensaun ba empreza responsavel hodi tau poste eletrisidade, atu labele fó impaktu ba populasaun nia vida,” nia informa.
Jornalista: Vitorino Lopes da Costa
Editór: Xisto Freitas da Piedade
