DILI, 05 juñu 2023 (TATOLI) – Prezidente Tribunál Rekursu (TR), Deolindo dos Santos deklara partidu vensedór iha eleisaun parlamentár tinan ne’e mak partidu Congresu Nasinál Rekonstrusaun Timorense (CNRT, sigla portugés).
Nia rekorda, iha loron 21 maiu povu Timor-Leste partisipa Eleisaun Parlamentár, hafoin povu ezerse nia direitu ba votu. CNE halo kedan prosesu apruramentu nasionál tuir lei eleisaun parlamentár haruka.
Hafoin CNE koklui prosesu apuramentu rezultadu provizóriu Eleisaun Parlamentár, tuir lei iha oras 48 ba partidu konkorente Eleisaun Parlamentár atu hato’o rekursu, maibé partidu sira la halo rekursu.
“Nune’e CNE remete kedan rezultadu provizóriu Eleisaun Parlamentár mai iha Supremu Tribunál Justisa atu valida tuir lei. Hafoin Tribunál Rekursu simu tiha rezultadu provizóriu mak, CNE remete mai iha Tribunál. lihosi validasaun no akordaun Tribunál nian la hetan buat ruma ne’ebé atu influénsia CNE nia servisu durante prosesu apuramentu nasionál no prosesu hotu CNE halo tuir de’it lei”, Deolindo dos Santos deklara iha sala audiénsia Tribunál Rekursu, segunda ne’e.
Prezidente Tribunál Rekursu (TR), Deolindo dos Santos deklara katak lihosi akordaun Tribunál Rekursu iha partidu lima mak liu bareira 4% iha Eleisaun Parlamentár, partidu hirak ne’e mak CNRT ho deputadu 31, Fretilin 19, PD ho 6, KHUNTO 5 no ikus liu PLP ho Deputadu nain 4.
“Akordaun Tribunál nian ne’e Tribunál Rekursu públika iha jornál Repúblika”, nia afirma.
Deolindo kongratula povu Timor-Leste tanba lihosi nia maturidade bele partisipa iha Eleisaun Parlamentár ho di’ak tebes no kongratula mós partidu polítiku 17 ne’ebé partisipa iha prosesu demokrátiku.
Lider Judisiáriu ne’e mós kongatula orgaun eleitorál CNE, STAE ne’ebé organiza eleisaun ne’e bele la’o di’ak inklui seguransa sira, jornalista sira ne’ebé halo públikasaun sira inklui observadór nasionál no internasionál sira ne’ebé kna’ar iha Timor-Leste.
“Ita presia Timor-Leste hanesan nasaun ne’ebé ninia prosesu demokrátiku la’o di’ak no iha no hakmatek, ida ne’e hatudu pasu pozitivu ba Timor-Leste hanesan nasaun demokrátiku”, Deolindo apresia.
Tuir rezultadu, totál akta apuradu hamutuk 1.472 (100%) totál eleitór rejistradu iha 890.145, totál eleitór tuir votu 705.693. taxa partisipasaun 79%, kompostu hosi feto iha 343.278 (48.64%) no mane 362.415 (51.36%).
Rezultadu votu válidu hamutuk 692.521 (98.13%) votu branku 2.698 (0.38%) votu nulu 10.387 (1.47%). Votu rejeitadu 61 (0.01%) no votu reklamamente 0 (0.00)
Partidu 17 ne’ebé kompete eleisaun parlementár 2023 hanesan Partidu Dezenvolvimentu Nasionál (PDN) hetan votu 597 (0.1%). Partidu Libertasaun Povu Aileba (PLPA), 3.272 (0.5%). Partidu Libertasaun Popular (PLP) 40.720 (5.9%). Partidu Demokratiku (PD) 64.517 (9.3%).
Partidu Kmanek Haburas Unidade Nasional Timor Oan (KHUNTO), 52.031 (7.5%). Partidu Os Verdes de Timor (PVT) 25.106 (3.6%). Partidu União Demoratiku Timorense (UDT) 1.256 (0.2%). Partidu Unidade Dezemvovimentu Demokratiku (PUDD) 21.647 (3.1%). Partidu Republikano (PR) 1.558 (0.2%).
Partidu Unidade Nasional Demokratiku Resistensia Timorense (UNDERTIM) 023 (0.1). Partidu Fretilin 178338 ( 25,8%). Partidu Congresso Nasional Rekonstrusaun Timorense (CNRT) 288,289 ( 41.6%). Partidu Centro Accao Sosiál Demokrata (CASDT) 170 (0.5%).
Partidu Movimentu Libertasaun Povu Maubere (MLPM) 642 (0,1%)
Partidu Socialista Timorese (PST) 2.415 (0.3%). Partidu Demokrátiku Cristao (PDC) 1.262 (0.2%). Partidu Asosiação Popular Monarquia de Timor (APMT) 678 (1.0%).
Jornalista: Natalino Costa
Editór : Zezito Silva
