DILI, 20 juñu 2023 (TATOLI) – Saudoza Isabel Ferreira aban sei halot ikus iha semitériu Públiku Becusse.
“Aban sei halot saudoza Isabel Ferreira nia isin mate iha semitériu Becusse”, komunikadu ne’e TATOLI asesu husi Gabinete Primeiru Ministru Taur Matan Ruak, ohin.
Tuir oráriu ne’ebé iha katak saudoza Isabel Ferreira aban 21 juñu 2023 tuku 12:00 OTL meudia sei almosu hamutuk iha rezidénsia saudoza nian iha Metiaut. Depois iha tuku 14:00 OTL lori kadaver saudoza Isabel nia isin mate sai husi uma Metiaut ba Igreja Balide no tuku 15:00 OTL sei halo misa Requiem iha igreja Balide.
Nune’e remata misa Requiem família matebian sira sei lee biografia saudoza Isabel Ferreira nian no família matebian kontinua hato’o lian agardesimentu.
Depois remata misa requiem sei lori saudoza Isabel Ferreira nia mate isin ba deskansa ikus iha semitériu Becusse, kari aifunan ikus no fahe malu.
Jornalista : Felicidade Ximenes
Editór : Zezito Silva
